Read Thado Chin Labu 132 Bible Online

Labu 132 - Thado Chin bible

Labu 132

¹Kaisang chehcheh ding la Pakai David leh athoh hahsatna jouse chu geldoh-in.

²Pakai henga iti ama kitepma, chule Jacob Pathen hat chungnung henga iti ana kihahsela hitam.

³Atahbeh-in ka insunga lutpong ting, kajalkhuna jong kicholdo din lutponge;

⁴Kamit ho imutsah pongting, ahiloule lulhuh jong lulhuh sah ponge.

⁵Pakaiya dinga munkhat kamudoh kahsen, hat chungnung Jacob Pakai dinga chendetna in kamudoh kahsen.

⁶ Veovin, hiche thuchu Ephratah'a kajauvin; gammang lah-a chun kamutaove.

⁷Ama houbuh sunga eiho cheohitin; eihon akhophang bullah houvu hite.

⁸O Pakai, thoudoh-in, nacholdona sunga lutnin; nangmale nathahatna thingkhong toh kipatdohtan.

⁹Nathemputeu chonphat na-in kivonuhen; chule namithengte kipah-in ao vuhen.

¹⁰Ajehchu nasoh David jal-in, nathaonupa mai chu heimangpeh hih-in.

¹¹ Pakai chu David henga thutah in akihahselin; chua kona kiheimang lou ding; nanga kona hung doh khat, nalaltouna chunga katousah ding ahi.

¹²Keiman amaho kahilding kathu lhunle kathu hetohsah nahi, nachaten anit uva ahile amaho jongchu a-imatih chana nalal touna chunga touding ahiuve.

¹³Ajehchu Pakaiyin achenna ding anadeitan; Zion chu analhengtan ahi.

¹⁴Hichehi a-imatih channa kacholngah na ahin; kadeitah anahijeh-in, hia hin chengjing tange.

¹⁵Aneh dingu nengtah-in phungvuh ingting; ami gentheite changlhah-in vah vange.

¹⁶Athemputeu huhhingna-in von ingting, chule amithengte kipa aw-thonga ao dingu ahi.

¹⁷ Chukoma chu keiman David ki kadotdoh sah ding; kathaonu dinga chun thaomei khat kaphudet pehtai.

¹⁸Amelmateu jachatna-in voning ting; ahinla ama tah chunga vang alallukhuh chu khangtou jing ding ahi.