Read Thado Chin Labu 135 Bible Online

Labu 135 - Thado Chin bible

Labu 135

¹Pakai chu vahchoijun, nanghon Pakai minchu vahchoijun, vo nangho Pakai sohte, amachu vahchoijun.

²Nangho Pakai insunga dingteho, Pathen in hongsunga dingteho,

³Pakai chu aphat jeh-in, Pakai chu vahchoijun, nomtah ahijeh-in, aminin vahchoina la saovin.

⁴Ajehchu Pakaiyin ama ding tumin Jacob akilhenin, chule agou tum mong dingin Israel akilhentai.

⁵Ajehchu Pakai chu loupitah ahi kahen, chule I-Pakaiyu hi Pathen jouse chunga ahi.

⁶Pakaiyin alunglhaina chan chu van'a, leija, twikhanglen sunga chule mun thuhtah ho jouse-a aboljin ahi.

⁷Aman leiset kolmang ho-a konin twimeiho ajamdoh sah-in, go juhna dingin kolphe asemin, akholna in'a konin khohui ahin lhadohjin ahi.

⁸Aman Egypt gama mihem apeng masa mihem le gancha, agomin athat gamin ahi.

⁹Vo Egypt gam, Pharaoh chung leh asohte jouse chunga, aman melchihna le thil kidang nalah uva ahinsolin ahi.

¹⁰Namlenho asumangin, chule leng hattaho athat gamin ahi.

¹¹Amor mite lengpa Sihon leh Bashan lengpa Og, chule Canaan lenggam ho jouse;

¹²Chule agammu chu goulo din, ami Israelte gouchan din apetan ahi.

¹³Vo Pakai, namin chu tonsotnin aumjingin, chule vo Pakai, nahetjingna chu khangjouse lhumkeijin aumjinge.

¹⁴Ajehchu Pakaiyin amite thu atanding ahin, chule asohte chungchanga alung aheiding ahi.

¹⁵Pathen hephalouho milimhou chu dangka le sana, mihem khutna kisem ahi.

¹⁶Amahon kam aneijun ahinla apaothei pouvin, mit aneijun ahinla kho amupouvin;

¹⁷Amahon nakhang aneijun ahinla kho ajapouvin, akam sunguva jong haina himhim aumpon ahi.

¹⁸Hicheho semho chu amaho tobangbou ahin; Chucheho tahsan chan jong chu chutima chu ahiuve.

¹⁹Vo Israel insung mite, Pakai chu vahchoijun; vo Aaron insung mite, Pakai chu vahchoijun.

²⁰Vo Levi insung mite, Pakai chu vahchoijun; Pakai gingte nanghon, Pakai chu vahchoijun.

²¹Jerusalem'a cheng Pakai chu, Zion'a konin nunnom hen, Pakai chu vahchoijun,