Read Thado Chin Labu 139 Bible Online

Labu 139 - Thado Chin bible

Labu 139

¹La Lamkaipa dinga, David Labol Vo Pakai nangin neikhochillin neihetai.

²Nangin katoulhah le kadindoh jong nahen, gamlatah-a konin ka lunggel ho jong nahen ahi.

³Nangin kalampi le kaluplhah nakhol toh-in, chule kalampiho jouse nahechen sohkeije.

⁴Ajehchu, vo Pakai, kaleija thu khatcha aumpon, ahinla vetan abonin na hesoh-in ahi.

⁵Nangin kanungle kama-a nei-um ton, kachunga nakhut nangamjin ahi.

⁶Chutobang hetna hi keidin akidang behseh-in, asangin, kasoh phajou poi.

⁷Nalhagaova kona hoilama kache-a, ahilouleh na-angsunga kona hoilama kajamding ham?

⁸Van'a kaltou jongleng chu-a chun naumin, thikhol khul'a jalkhun kido jongleng, vetan, chumuna jong chun na-umme.

⁹Jingkah lhavingho kilah ingting, twikhanglen mongpeh-a gacheng jongleng,

¹⁰Chukom jenga jong chun nakhutnin neikaijin natin, nakhut jetna neituh ding ahi.

¹¹Thonlouva muthimin eikhuding ahi tijongleng, jan jengjong chu kavela vah hiding ahi.

¹²Henge, muthim chu nanga konin akiselpon, jan chu sun bangin avahjoi, nangdia muthimle khovah ania kibang ahi.

¹³Ajehchu kasungil jouse jong nangma gontoh ahin, nangin kanu naobu sunga neinakhu ahi.

¹⁴Kichat um le kidangtah-a kisem kahi jeh-in, nangma Kavah choije; nanatoh hohi datmo aumin, chule hichu kahina hin ahechen lheh-e.

¹⁵Aguh-a eikisema chun ka gong hi namasanga akiselpoi, kidang tah-a leiset noinung pena eikisem ahi.

¹⁶Katibah jouse hi khatcha aum masang, chamkim loulai ka gong hi namitnin namun; nalekhabu-a chu hicheho jouse hi akisemjou masanga kisun sohkei ahitai.

¹⁷Vo Pathen nalunggel ho hi keidia iti mantam hitam! akisuhto khom chu iti natsatna hitam!

¹⁸Kasimding hitale neldi sanga tamjo ahiuvin; kakhahdoh jengin jong nangto kaum khom nalaije.

¹⁹Vo Pathen, migilou chu thonlouva nathatei ding ahin, hijeh chun nangho thisan sohatte, keija konin potdoh-un.

²⁰Ajehchu nangma dounan giloutah-in thu aseijun, chule namelma ten mohseh-in namin apanuve.

²¹Vo Pakai nahote chu kahotbol louham? Chule nangma douna-a kipatdoh ho chunga kalungphatmo louham?

²²Amaho chu hot atin kaho-in; kamelma-a kasimu ahitai.

²³O Pathen, Neikhol chilin chule Kalungthim hi he-in; nei patepmin, chule kalunggel hohi hechenin.

²⁴Chule ven keija hin khangitlouna lampi khattou aumdem, chule tonsot lampia chun neipuijin.