Read Thado Chin Labu 145 Bible Online

Labu 145 - Thado Chin bible

Labu 145

¹Ka Pathen, vo lengpa nangma vahchoi jingting, chule atonsot atonsotnin namin choi-an inge.

²Aniseh-in choi-an ningting, chule atonsot atonsotnin namin vahchoi jinge.

³Pakai chu aloupi-in, sangtah-a vahchoi ding ahi; chule aloupinahi holdoh jouhoi ahipoi.

⁴Nanatoh hohi khang khatnin, akhangkit geija avahchoija, chule thanei tah-a natohho aphon dohdiu ahi.

⁵Nalal loupina le jana chu keiman seijing ting, nathilbol kidangho seijing kate.

⁶Miten nathilbol gimneitahho thaneije seijuntin, chule keiman naloupina kaphonjal ding ahi.

⁷Amahon lhingsetnin naphatna loupitah geldoh untin, chule nachon phatna chu la'n saovinte.

⁸Pakai chu lungsetna le khotona-a dimset ahin, lunghang vahlou, chule hepina dimset ahi.

⁹Pakai chu mitin din aphan; chule ahepina chu anatoh jouse chunga aume.

¹⁰Vo Pakai nathilbol jousen navahchoi juntin, chule namitheng ten nachoi-at dingu ahi.

¹¹Amahon nalenggam loupije seijuntin, chule nathaneije asei dingu ahi.

¹²Athilbol thahatje mihem chapate ahetsah ding; chule alenggam lal loupi ahetsah ding ahi.

¹³Nalenggam chu tonsot lenggam ahin, chule navai homna akhang khanga um jingding ahi.

¹⁴Pakaiyin alhu jouse akaidingin, chule aki sonkunho jouse akaithouvin ahi.

¹⁵Nangma velhijinga um mitjouse chu; aphatchan anehdiu napejin ahi.

¹⁶Nangin nakhut najah-in, ahingthei jouse angaichat cheh-un nalung lhaisahjin ahi.

¹⁷Pakai chu alampi jouse-a chonpha ahin, anatoh jouse-a athenge.

¹⁸Pakaiyin akoute jouse heng anaijin, dihtah-a ama koute jouse heng anaije.

¹⁹Aman ama gingte ngaichat suhbulhit peh intin, ataonao asan peh-a, ahuhhing diu ahi.

²⁰Pakaiyin ama ngailuho jouse hongbit nintin, migilou jouse vang asuhmang ding ahi.

²¹Kakamin pakai vahchoina thu asei ding ahi; tahsa mihing jousen amintheng atonsot atonsotnin vahchoi uhen.