Read Thado Chin Labu 17 Bible Online

Labu 17 - Thado Chin bible

Labu 17

¹Vo Pakai, adihchu ngaijin lang ka kana hi ngailhin, alhem hilou ka kama kataona ngaina din nana hinsungin.

²Kachunga thulhuhna chu nanga kon hihen lang, namit tenin thil kibangho chu vehen.

³Nangin kalungthim nakhol chilin, janteng nei vilin, nangman neipatep in, ima namu louding ahi; kakamin suhkhel aneilou dinghi kakigel lhahna ahi.

⁴Mihem natohho thudol, nakama thusoh jal-in, mi sumang jingho lampiho-a konin kakiveng tupmin ahi.

⁵Kakalsona kalhuh lounadin, nalampi ho kajotna-a neituh-in.

⁶Vo Pathen, keiman nangma kakouvin, nangman neingaipeh innate; keima lama nakol hinsungin lang kathusei neingaipeh-in.

⁷O nanga atahsanu ngam jouse, amaho douho khutna kona khut jetna huhhingji-a chun, nangailut kidang chu neimusah-in.

⁸Nalungset khat bangin neihongin lang, nalhalim noija neiselin,

⁹Eisumang thei migilouva konle, thitheina melma eium chahho-a konin neihongin.

¹⁰Amahon alungthimu thaotah chu akhahtupmun; akamun kiletsah tah-in thu aseijuve.

¹¹Amahon tun kakalsonao chana ei-umun; tollhanga suhngem dingin, amitnun eiveuvin,

¹²Keipi bahkaijin asatha apetel got bangle, keipi donglaijin munthip ho-a achanlhih abanguvin ahi.

¹³Vo Pakai, thouvin, ama chu lunglhah sah-in, nachemjamin migilouva konin kahinkho huhdoh-in,

¹⁴Vo Pakai, nakhutna um mihemte-a konle vannoi mihem hiche hinkho-a chan neiho, atumpiu nagou sela nadip dimpeh ho-a konin kahinkho huhdoh-in; amaho chapang tamtah ahiuvin, athilu amoh chu achasen hou adalhahpeh taovin ahi.

¹⁵Keiman vang namai chu chonphatna-a kahinvet ding; Nangma bangtah-a kahungtho teng keima kalungna chimtante.