Read Thado Chin Labu 18 Bible Online

Labu 18 - Thado Chin bible

Labu 18

¹Vo Pakai, kathahat nan, keiman nangma ngailunge.

²Pakai chu kasongpile kakulpi chule eihuh hingpa ahi; ka Pathen, kathahatna, achunga katahsana kangap ding ahi; ka lumle, kahuh hingna ki, chuleh ka kulpidet ahi.

³Vahchoi dia lomtah Pakai chu kou ingting, chutichun kamelma te-a konin huhdoh in umtange.

⁴Thina lung genthei nahon eiumkimvelin, Pathen nahsahlouho twisoh-in eikichatsah-e.

⁵Thikholkhul lung genthei nahon eiumkimvelin, thina thangho chun ei kimaito pi-e.

⁶Kagen theina a Pakai chu kakouvin, ka Pathen kasamin; Aman a-houin'a konin ka aw ajan, kakana chu a-angsung geijin aluttan ahi.

⁷Chujouvin leiset akilingin, akihottai; Ama lunghan jeh-in lhangbul ho chu achatnin akihottai.

⁸Anah homa konin meikhu akitung doh-in, akama kona mei chun akavam heltan, hichun meihol a-al lenglung sah-in ahi.

⁹Aman vanho jong asonkunin, ahung kumlhan; muthim lhangkhal chu akengto noija aumin ahi.

¹⁰Ama Cherub chunga atouvin, alenge, henge, hui lhavingho chungah alengin ahi.

¹¹Aman muthim lhangkhal chu ama munthip min asemin; akimvela apon in chu twipi thimjejule van'a meilhang satah chu ahi.

¹²Amasanga vahpem puma chun meilhang satah achen, gelchangle meikong alhan ahi.

¹³Pakaiyin vanho jong thongjejun aginsah in, chungnung pen chun a-aw asodoh in ahile gelchangle mei alhan ahi.

¹⁴Henge, aman athal changho chu asoldoh-in ahile akithe chehtai, aman kolpheho akapdoh in, chule amaho chu ajoutan ahi.

¹⁵O Pakai nangman napho-a nanah nakhon khum tengle twilona jouse akimujin, chule vannoi leiset bulpi jouse jong akilangdoh jin ahi.

¹⁶Aman chunglama konin asolin, eituh in, twi tamtah lah-a konin eikaidoh-e.

¹⁷Aman kamelma hattah-a kon leh eihot bolho-a konin eihuhdoh-e; ajehchu amaho keidingin ahat lheh jengun ahi.

¹⁸Hamsetna kato-nin amahon eikitopiuvin, ahinla Pakai chu kaki ngaina ahi.

¹⁹Aman mun lentah khatna jong eipuidoh-in, kachunga akipajeh-in eihuh dohtan ahi.

²⁰Kachon phatna dungjuijin Pakaiyin kipaman eipen, kakhut then dungjuijin eilethuhnai.

²¹Ajehchu keiman Pakai lampiho chu kajui jingin, ka Pathen'a konin giloutah-in kapotdoh khapoi.

²²Athutan lhahna jouse kamasanga aumin, adan kisemho chu keija konin kapaidoh khapoi.

²³Ama anga chondih jong kahin, kakhan gitlouna-a konin kakihongbit jinge.

²⁴Hijeh chun Pakaiyin chonpha kahinale, amitmua kakhut athen dungjuijin eilethuh jin ahi.

²⁵Mihepi themho chu hepina musah-in natin; mi chondihho chu nachondihna vetsah-in nate;

²⁶Athenga chu nathenna musah-in natin, lung gilouho chu nalung gitlouna musah-in nate.

²⁷Ajehchu nangin aki bolgenthei hochu huhdoh-in natin; akichoisangho chu nasotlhah ding ahi.

²⁸Ajehchu nangin kathaomei neivah peh-in natin, Pakai ka Pathen'in keija um muthim hi salvah-inte.

²⁹Ajehchu nang jal-in sepaihon lah-a kalhaijin, ka Pathen jal-in kulbang kachopkhupme.

³⁰Pathen dingin alampi apha chamkimin; Pakai thu chu patepmin aumin; Ama tahsan jousedin ama chu lumdal ahi.

³¹Ajehchu Pakai tailou koiham Pathen? ahiloule i-Pathen'u tailou songpi koiham?

³²Hatna-a kakong eigehpeh-a leh kalampi sempha chamkima Pathen ahi.

³³ Aman kakeng chu sajuhpi keng bangin asemin, kamunsangho chunga eiumsahjie.

³⁴Kaban teni-a thih thalpi kaheboh theinadin, aman kakhut teni gal bolje ahile.

³⁵Nangin nahuhhingna lumdal jong chu neipen; nakhut jetlamin neikai doh-in nanun nemna chun lentah eisoi.

³⁶Kalhuh louna dingin, kakho lhahna ding neisem letpeh-in ahi.

³⁷Kamelmate nung kadelin, kaphan, amaho kasuh manghel kahsen kahungkile jipon ahi.

³⁸Amaho athodoh joulouhelna diuvin kamavon, kakengto noija alhusoh helun ahi.

³⁹Ajehchu nangin galsatna-a ding thahatna kong neigah peh-in; keima douna-a hungkipatdohho chu kanoija nasunem hele.

⁴⁰Eithetbol ho chu kasuhmang theinadin, nangman kamelmate ngong hochu neipetan ahi.

⁴¹Amaho apengun, ahinla ahuhdoh dingula khatcha aumpon; Pakai jengjong akouvun, ahinla aman adonbut dehpouve.

⁴²Chu jouvin huinung masanga vutvai bangin amaho kavogoijin; lamlena thilboh bangin kapai doh-in ahi.

⁴³Nangin miho kisat tona lah-a konin neihuh doh-in; chule nangin keima Pathen hepha louho luchangin neisemin, kahetkhah lou mihon eijendiu ahi.

⁴⁴Kathulhut ajah jah-uleh eijoppai juntin; gamdang miho chu kahenga hungkipelut diu ahi.

⁴⁵Gamdang miho chu hung lhasam untin, akulpi houva kona kithing pumpuma hung dohdiu ahi.

⁴⁶Pakai ahing jinge; kasongpi chu nunnom hen; eihuh hinga Pathen chu choisangin umhen.

⁴⁷Kaphu eilahpeh-a, miho kanoija sunema chu Pathen ahi.

⁴⁸Aman kamelma te-a konin eihuhdoh-e; henge, keima douna-a hung kipatdoh ho chung vuma neidom sangin; hunam mipa-a konin neihuh doh tai.

⁴⁹ Hijeh chun O Pakai, Pathen hephalou ho lah-a chun nangma na thangvah ingting, chutengle nangma min vahchoi la sange.

⁵⁰Aman huhhingna lentah chu alengpa apen, chule athaonu David leh achilhahte chunga chun ahepina tonsotna din amusah-e.