Read Thado Chin Labu 19 Bible Online

Labu 19 - Thado Chin bible

Labu 19

¹La lamkaipa henga, David Labol Vanhon Pathen loupina aphong doh-un; chule vanthamjolin akhutsem amusah-e.

²Sunin sun jah-a thu aseijin, chule jan-in jan jah-a hetna amusah-in ahi.

³Hichea chun thu kisei aumpon, paole oginjong akijapoi.

⁴ Atena khao chu leiset pumpi-a chule athu uchu vannoi leiset kolmang geijin akikhon; Hicheho-a chun aman nisa dingin ponbuh khat asongin,

⁵Hichu moulang a-indana kona hungdoh tobang ahin, kilhaitetna-a lhaiding pasal hat bangin athanome.

⁶Apotdohna chu van mong langkhatna kipan ahin, alhuna chu among langkhat chan ahi; chuche asatna-a kona kisela imacha aumpoi.

⁷Pakai dan chu achamkimin, hinna sempha-a ahi; Pakai thu hettohsah chu athengin, mimol ho achih sah-e.

⁸Pakai dan kisemchu adih-in, lungsung akipasah-in; Pakai dan thupeh chu athengin, mit teni avahsah-in ahi.

⁹Pakai ginchu athengin, a-imatih channa aumjingin; Pakai thutanlhahho chu thutah le chonphatna ahisoh keije.

¹⁰Hicheho chu sana sangin jong dei aumjon, henge, sana thengsel sangin jong athengjoi, khoijule khoiphang sanga jong lhumjo ahi.

¹¹Chukalvalin nasohhi nagihsalin; chule hicheho chintupna-a chun kipaman lentah aumin ahi.

¹²Ama suhkhel ho kihetkhen jouva koiham? Guhthima kasuh khella konin neisuthengin.

¹³Nasohhi kihoitho sahna chonset ho-a konin jong neituh-in; hitiho chu kachunga vaihomsah hih-in; chutengle keima kalung thenga, chule keima suhkhelna lentah-a kona monabei kahiding ahi.

¹⁴O Pakai, kahatnale eilhandampu, kakama thupot hole kalungthim sunga kagelhi, namitmun santhei doltah hihen.