Read Thado Chin Labu 21 Bible Online

Labu 21 - Thado Chin bible

Labu 21

¹La lamkaipa henga, David Labol Vo Pakai, nahatna-a lengpa kipah intin, nahuhhing na-a ama iti akipa tadem!

²Nangin alung ngaichat napen, akama athumho chu na-it pehpoi.

³Ajehchu Nangin ama chu phatnale phattheina ho in navengbit in, sana thengtah lallukhuh alua nakhuh peh-e.

⁴Aman nahenga hinkho athumin, nangin tonsot hinkho saona jengjong napetan ahi.

⁵Nami huhhingna jana loupi chu anasata ngeijin, janale lalna chu achunga nangam tai.

⁶Ajehchu nangman tonsotna phattheina chungnung changdin ama nasemin; na-umpina chun kipana chungnung apen ahi.

⁷Ajehchu lengpan Pakai atahsanin, chule chungnung pen hepina jeh-in ama chu kiling ponte.

⁸Nakhutnin namelmate jouse holdoh intin, nahote chu nakhut jetnin holdoh inte.

⁹Nalunghan tengle amaho chu lhumsung meikong banga nasemding; Pakaiyin alunghana-a aval lhumuva, chule meichun ahalvam gamdiu ahi.

¹⁰Amaho ga chu leija konin, chule achilhah-u chu leisetna mihem chate lah-a konin sumangin nate.

¹¹Ajehchu amahon nangma douna-in thilse bol agouvin; amahon aboldoh joulou dingu thilphalou angaitouvin ahi.

¹²Hijeh chun nangin nathal changho akhaoto nasuhto-a amai dungu nadoitengle, nangin amaho nakinungle sah ding ahi.

¹³Pakai, nathahatna achun, nangma kichoisangin, chutia chu keihon nathahatna chu vahchoina la-a kasahdiu ahi.