Read Thado Chin Labu 22 Bible Online

Labu 22 - Thado Chin bible

Labu 22

¹Aijeleth Shahara Dinga La lamkaipa henga, David Labol Ka Pathen, ka Pathen ibola neidalhah hitam? Ipidinga eipanpi dingle gimthoh-a kapena awchenga kona nahiti gamlat hitam?

²Vo ka Pathen, suntengle nangma kasamjin, ahinla neijah pehpoi; chule jankhon jong thiptih kanei jipoi.

³Ahinla nangma atheng nahin, Israelte pachatna-a chengjinga chu nahi.

⁴Kapu kapa teovin nangma natahsan uvin, amahon natahsanun, chule nangin amaho nahuhdohjin ahi.

⁵Amaho nangma henga ataovun, nahuhdohji-e; amahon nangma natahsan jeh-uchun, akisudong jipouve.

⁶Ahinla keima lungtol bep kahin, mihem kahipoi; chule mihemte i-sah loule mite nahsahlou kahi.

⁷ Eimu chanin nahsahlouvin einuisatnun; amuh aholpumun, alu athingun, aseijiuvin,

⁸ Aman eihuhdoh-inte tin Pakai chu atahsanin; Achunga akipa amujeh-in aman ama huhdoh tahen.

⁹Ahinla nangma naobu sunga kona einaloi doh-a chu nahin, kanu anga kaumlaija neina kinepsahsa ahitai.

¹⁰Keima naobu-a kona nachunga eina sekhumu ahin, kanu oisunga kona ka Pathen nahitai.

¹¹Keija konin gamlahih-in, ajehchu lungkhamna anaije; ajehchu eipanpi ding khatcha aumpoi.

¹²Bongchal tamtah-in eiumkimvelun; Bashan bongchal hattahhon eiumkimvel sohtai.

¹³Keipi bahkai hangtah kitum bangin, akam eikat hom khumun ahi.

¹⁴Keima twibangin eikisunglhan, kagu kachang jouse akikhensoh in; kalunghi khoilu bangin kagilpi sunga ajollha tai.

¹⁵Kathahat nahi leibel chipsa bangin agolhatan; chule kalei jong kadanga abehchah in, nangin thina leivuija neipuilut tai.

¹⁶Ajehchu uicha hon eiumkimvelun; khangilou mipi kikhom hon eium naijun, kakhutle kakenghohi asunun ahi.

¹⁷Kagujouse kasimtheijin, amahon eiveovin eigaldot uve.

¹⁸ Amaho kavon jouse akihomun, chule kaponsil changding jong vang akisan taove.

¹⁹Vo Pakai nangma keija konin umgamla hih-in, vo kathahatna, eipanpi dingin kinon.

²⁰Kahinna hi chemjam'a konin huhdoh-in, kahinkho manlutah hi uicha thanei na-a konin huhdoh-in.

²¹Keipi bahkai kamsunga konin neihuh doh-in, ajehchu sakol kinei kiho-a konin jong neina ngaipeh-in ahi.

²² Kasopite henga namin phongleng ting; mipi kikhomho lah-a nangma kavahchoi ding nahi.

²³Pakai ginga nanghon ama vahchoijun, Jacob sonho jousen ama choi-anun, Israel sonho jousen ama chu gingun.

²⁴Ajehchu aman bolgenthei thohho chu nahsahmole hotnin abol gentheipon, ama-a konin jong amai aselpoi; ahinla ahenga athumteng angaipehjie.

²⁵Mipi kikhomho tamtah lah-a kapachatna chu nanga hintin, ama gingte angsunga kakitepna ho lhutninge.

²⁶Minunnem hon neovintin, lunglhaijunte; ama holho chun Pakai chu vahchoi unte; nalungthim chu tonsotna hingding ahi.

²⁷Leiset kolkimvelin Pakai ageldoh-a Pakai henga kilediu; chule chitin namtin jousen ama ahou dingu ahi.

²⁸Ajehchu lenggam chu Pakaiya ahin; chule ama namtin lah-a vaihompa ahi.

²⁹Leichunga khangtouho jousen neovintin chule ama ahoudiu; leivuija kileding jouse a-anga kuncheh ding; koimachan ama hinna akihuhjou louding ahi.

³⁰Chilhah khatnin ama jenintin, hichu Pakai henga khangkhatna kisimding ahi.

³¹Amaho hunguva, ahung pengding miho henga hiche athilbol aumchan chonphatna hi aphondoh dingu ahi.