Read Thado Chin Labu 25 Bible Online

Labu 25 - Thado Chin bible

Labu 25

¹David Labol Vo Pakai, na-anga, kalhagao kadom sange.

²Vo ka Pathen, nangma katahsane, nei jachatsah danlang, kamelmate neijosah hihhelin.

³Henge, nangma ngahjinga um chanchu jumso hih-in, ajeh beija suhkhelna neiho vangchu jachatsah-in.

⁴Vo Pakai, nalampi ho neimusah-in, na lamlhahho neihilin.

⁵Nathutah-a neipuijin lang, neihilin, eihuh hinga Pathen nahi jeh-in nilhumkeijin nangma kangeh-e.

⁶Vo Pakai, masang laija anaumjingsa nahi jeh-in, nahepi khotonale nangailut lungsetna chu geldoh in.

⁷Kakhang donlai chonset hole suhkhelnaho geldoh hih-in, Vo Pakai naphatna jehle nahepina dungjuijin neigeldoh in.

⁸Apha le akitah chu Pakai ahin; hijeh-a chu aman michonse te chu alampi ahilding ahi.

⁹Aman milungnengho thutan na-a kaihoi jintin, milungneng chu alampi ahilding ahi.

¹⁰Athulhunale athu hettohsahna tuhdet ho dingin, Pakai lamlhah jouse chu hepinale thutah ahi.

¹¹O Pakai, namin jal-in kakhan setna nasatah hi ngaidamin.

¹²Pakai ginga mi chu koiham? Aman akilhending lampi chu aman ahilding ahi.

¹³Ahinkho-a nomtah-a chenga, achilhah ten leiset alodiu ahi.

¹⁴Pakai thuguh chu ama gingho-a uma ahin, akitepna chu amaho amusah ding ahi.

¹⁵Aman kakengteni lenna kona asutlhah ding jeh-in, kamitnin Pakai lamjeng akat jingin ahi.

¹⁶Kaheng lama hung kiheijinlang kachunga khotona neineijin, ajehchu lung thomhaole thohgima um kahitai.

¹⁷Kalunga lungkhamna ho anasa behsehtai; O kahesohna ho-a konin neipuidoh tan.

¹⁸Kahesoh nale kathoh nat nahi hin venlang, chule kachonsetna jouse neingaidamin.

¹⁹Kamelma tehi ngaito temin, ajehchu tamtah ahiuvin, nasatah in eihouvun ahi.

²⁰Kahinna hongbit ninlang, neihuhdoh tan, nangma-a katahsan kangapjeh-in, neijachat sah hih-in.

²¹Nangma ngah-a kahijeh-in, lungthen le dihcham kimna chun eivengtup hen.

²²Vo Pathen, alungkhamnao jouse-a konin Israel hi lhatdoh tan.