Read Thado Chin Labu 28 Bible Online

Labu 28 - Thado Chin bible

Labu 28

¹David Labol Vo Pakai le kasongpi, nahenga hungtaovinge, keima neithipsan le, kotong sung kijotlut ho tobang kahiding ahitai.

²Nahenga kaka-a, namun theng lam nga-a kakhut kahindop teng, kathumna aw neingaipeh-in.

³Migiloule khanset bolho chutoh neikaimangtha hih-in, amahon aheng akom henga chamna thu aseijiuvin, ahinla alunguva thilphalou aumjinge.

⁴ Athilbollu dungjuile athil gilou bollu dungjuijin pen, akhutnuva atoh bangun lethuh inlang, aset mannu musah-in.

⁵Amahon Pakai natohle akhutna athilbol angaisahlou jeh un, aman amaho sumang intin, semphakit ponte.

⁶Kathumna eingaipeh jeh-in Pakai chu vahchoijin umhen.

⁷Pakai chu kathahatle kalumdal ahin; kalungin ama atahsanin, chule panpin kaumme; hijeh chun kalung akipah lheh-in, chule ama chu lan vahchoi tange.

⁸Pakai chu athahatnao ahin, ama chu athaonu dinga huhhingna thahat ahi.

⁹Namite huhhingin lang chule nagoulote phatthei boh-in; amaho chu vah inlang chule tonsotna din domsang tan.