Read Thado Chin Labu 29 Bible Online

Labu 29 - Thado Chin bible

Labu 29

¹David Labol Pakai chu vahchoina peovin, vo, van mite Athahat aloupina chu vahchoijun, Pakai chu loupina leh thahatna peovin.

²Pakaiya amin loupina chu peuvin; athen hoina-in Pakai chu houvun.

³Pakai aw chu twiho chunga aumin; Pathen loupinachu ahung kitumjah-in; Pakai chu twiho chunga chun aumin ahi.

⁴Pakai aw chu thaneitah ahin; Pakai awchu lal loupina-a dimset ahi.

⁵Pakai aw chun Cedar thingho amanthah sah-in; henge, Pakaiyin Lebanon'a Cedar ho asumang gamtai.

⁶Aman amaho bongnou bangin akichopsah-in; Lebanon le Sirion chu sakol kinei nou abahsah-e.

⁷Pakai aw chun meika al-lenglung aphelkhen-in ahi.

⁸Pakai aw chun gamthip gam ahotlingjin, Pakai chun Kadesh ahotlingtai.

⁹Pakai aw chun sajuhpi bongnou asosahjin, gammangho jong achaisah in, a-houin sunga umho jousen aloupina aseijuve.

¹⁰Pakai chu twisohho chunga chun atouvin; henge, Pakai chu tonsot lengdin atouvin ahi.

¹¹Pakaiyin amite henga thaneina pentin, Pakaiyin amite chu chamna-a phatthei abohding ahi.