Read Thado Chin Labu 33 Bible Online

Labu 33 - Thado Chin bible

Labu 33

¹Vo nangho michonpha ho Pakaiyah kipah jingun, ajehchu milungtheng dinga pachat lasah hi lomtah ahi.

²Selangdah in Pakai chu vahchoijun, manchah tumging khao somnei toh thon vahchoi La saovin.

³Ama vahchoina lathah khat saovinlang, aw thongin themtah-in tumging uvin.

⁴Pakai thu chu adih-in, athilbol jouse chu dihtah-a kibol ahi.

⁵Aman chonphatna-a thutanlhah angailun; leiset hi Pakai phatna adimin ahi.

⁶Pakai thua vanhohi kisema ahin, chule amaho janelpihi akamsoh ahua kon ngen ahiuve.

⁷Aman twipia twiho chu lomkhat bangin akoikhomin, twi thuhtah chu khol khomna in'a akholkhome.

⁸Leiset pumpin Pakai chu gingu hen, vannoi'a cheng jouse Pakai janan dimuhen.

⁹Ajehchu aman thu aseile akibol jengin, aman thu apehle aumden jenge.

¹⁰Pakaiyin Pathen hephalouho thuhil chu imahilou asosah in, mipi ho thilngaito chu phatchomna bei ahisah-e.

¹¹Pakai thumop chu tonsotnin ading jingin, alungngaito chu akhang akhanga ding ahi.

¹²Pathen chu Pakaiya neija nam mite, chule ama agoulo dinga kilhen mihochu anun nom ahiuve.

¹³Pakai chun van'a konin ahinven mihem chate jouse chu amui.

¹⁴Aman aumna mun'a konin leisetna chengho jouse chu ahinven ahi.

¹⁵Aman alungthim melputna akibahsah-in, athilbolhou jouseu agelpeh-e.

¹⁶Mipi janelin ahuhhing thei leng aumpoi, mihat tah jong ahatjeh-a kihuhdoh aumpoi.

¹⁷Sakolhi hoidohna dingin pannabei ahin; athahatna jeh-a jong koima ahuhdoh louding ahi.

¹⁸Veovin, Pakai mit chu ama gingte chunga, chule ahepina-a kinemho chunga aumjingin;

¹⁹Thina-a kona ahinnao huhdoh dingle, kellhah teng ahinna diu akoipeh-e.

²⁰Ihin naohin Pakai chu angah-in; ama eipanpiule ilumdalu ahi.

²¹Ajehchu ama mintheng itahsan jeh uva, ama-a ilungu kipahding ahi.

²²Vo Pakai nanga kakinepnao dungjuijin hepina kachung uvah umhen.