Read Thado Chin Labu 35 Bible Online

Labu 35 - Thado Chin bible

Labu 35

¹David Labol Vo Pakai, kakidoupi ho chu neiseitohpeh-in, eikisatpiho chu kisatpin.

²Lumdal leh pho paninlang, ikithopidin dingin.

³Tengcha jong satdoh inlang eidouva eisugentheiho lampi khah in, kalhagao jah-a, nahuhhingpa kahi tin seijin.

⁴Kahinna suhmang dinga holho chu kisuh dongsah inlang jachat sah-in, suhset eigoho chu sunohphah inlang kinungle sah-in.

⁵Amaho hui nung masanga changsi bahsah-in, chule Pakai vantil nungdel sah-in.

⁶Alampiu thimhen lang nal hen, chule Pakai vantil'in amaho bolgimhen.

⁷Ajehchu amahon ajeh beijin keidingin alen'u kotong sunga aselun, ajehbeija hichu hinna lahna dinga alaiju ahi.

⁸Kigingman louvin manthah na achunga lhunghen lang, alenthang sela chun amatah ohhen, chuche manthah na-a chun lhalut hen.

⁹Chutile kahinna Pakaiya kipah intin, ami huhhing na-a thanominte.

¹⁰Ama dinga hatbeh sehpa-a kona migenthei pa huhdoh-a; henge, achomgam dingpa-a kona migenthei milhasam huhdohpa, Pakai nang tobang koi umem? tia kagu kachang houvin asei dingu ahi.

¹¹Hettohsah lhemho akipat doh-un, kahet phahlouhel thil ho-a mo eichan uve.

¹²Kahinna suhmang nadin apha khelin ase kipamandin eisan sah uve.

¹³Keimavang amaho anat tenguleh kaponsil khaodip pon ahijin, an ngolin kahinna kasunemin, kataona ka angsung ngeija ahung kilahjin ahi.

¹⁴Kagol ham ahiloule sopi ham bangin kanaboljin, mi anu puldouho bangin kakhai khulele jin ahi.

¹⁵Ahinla kahesoh tengle akipah-un akikhom jiuvin, ahin panna beijin eidou dingin akikhomun hichu kenla kahepon, tang louvin eisam seuvin ahi.

¹⁶Golvahna-a phatlhem tothon, ahao eigel khumun ahi.

¹⁷Pakai itihchan navet thim ding ham? Kangailut tah kahinkhohi asumang ding keipi bahkaihoa konin huhdoh-in.

¹⁸Mipi kikhopna munna chun nangma thangvahna peng kating; mi tamtah lah-a nangma vahchoi jinge.

¹⁹ Kamelmate chu adihlou lamin kachunga kipa daohen, ajehbeija eihotbol teho chu amitnun kihou daohen.

²⁰Ajehchu amahon chamna thu him him aseipouvin; ahinla amahon gamsunga lungmonga um mongho dounan doha lungthim agongun ahi.

²¹Henge, keima dounan amaho hatah-in akam kaovin, chule amahon aha, aha, kamitnun kamutaove, atiuve.

²²Vo Pakai hichehi nangin namutan, thipbeh in umhih-in, vo Pakai keija konin gamla hih-in.

²³Ka Pakai leh ka Pathen, kathu tan dingin nang le nang hung kitildoh-in lang, hung thoudoh-in.

²⁴Vo Pakai ka Pathen, chonphatna dungjuijin kathu tanin lang, amaho kachunga kipah hih uhen.

²⁵Alunguvin amahon, kate! eiho ichandiu ahi tidaohen, eihon ama ival lhumtaove tidaohen.

²⁶Kakisuhkhah na-a kipahho chu jahchale lungdongin umkhom sah inlang, keima douna-a kiloupisah ho chu jachatnale jalounan kivonuhen.

²⁷Ka chonphatna natoh-a lunglhaiho chu, kipahle thanomin ao-vin la saohen: asoh phattheina chunga kipahji Pakai chu, loupitah-in umhen tin seijom jing taohen.

²⁸Chutile kaleijin chonphatna nilhumkeijin seitante.