Read Thado Chin Labu 37 Bible Online

Labu 37 - Thado Chin bible

Labu 37

¹David Labol Thilse bolho jeh-in lungkham hih-in, khangitlouna bolho chunga jong thangset bolhih-in.

²Ajehchu amaho hampa banga kivatlhu loidiu ahin, hamhing banga goploi diu ahi.

³Pakai tahsanin lang, thilpha bolin, chutile nangma gamsunga nachen ding, chule tahbeh-a suhlung lhaija naum ding ahi.

⁴Pakaiya jong kipah thanomin, aman nalung ngaichat jouse napeh ding ahi.

⁵Nalampi Pakai henga pedoh jengin; ama jong tahsanin chutile aman nabolpeh nante.

⁶Chutile aman nachon phatna chu vah bangin vahdoh sah intin, chule nathem chana chu sunlai bang ding ahi.

⁷Pakaiya cholngan, chule amachu lungneng tah-in ngah-in mi alamlhahna jouse-a akhantou jehle, thil gilou hinpodoh pa jeh-in lungkham hih in.

⁸Lunghan na-a konin tanginlang, chule lungsatna chu dalhan; ase bolna ding poupouvah kisugim hih-in.

⁹Ajehchu thilse bolte chu kipaidoh hel ding ahiuvin; hinla Pakai ngah jingte vang chun leiset chung alodiu ahi.

¹⁰Ajehchu chomkhat joule migilou umtalou ding, henge, lungthim themtah-in aum namun chu vele chun, ana umta ponte.

¹¹ Ahinla milung nengin vang leiset chung aloding, chule amaho chamna lhingset chunga kipah ding ahiuve.

¹²Migilouvin midih dounan thil agongjin, chule achungah aha agoiji.

¹³Pakaiyin ama anuisat ding ahi; ajehchu aman anikho hunglhung ding chu amun ahi.

¹⁴Migilouvin chemjam asatdoh-in, vaichale lhasam suhlhahna dingle thudih-a houlimho tha nadin athalpiu ajekonin ahi.

¹⁵Achemjamu amahotah lungchanga lutnintin, athalpihou kihebohpeh ding ahi.

¹⁶Mi chonphan lhomcha aneichu migilouho haona tamtah sangin aphajoi.

¹⁷Ajehchu migilou banjang kihebohpeh ding; midihtah ho vang Pakaiyin ageldoh jingding ahi.

¹⁸Midih nikhoho chu Pakaiyin ahen, agoulo ding chu tonsotna ding ahi.

¹⁹Amaho phat phatloulai jongle jahcha loudiu; Kel lhahlai jongle ninglhing diu ahi.

²⁰Ahinla migilou vang chu mangthah ding chule Pakai melmaho chu kelngoinou thao tahho bangdiu; amaho meikhu lah-a manghel diu ahi.

²¹Migilouvin batnin alan, asakitjipoi, michonphan vang hepina amusah-in, ahomji-e.

²²Ajehchu ama phattheiboh changhon leiset chung louvintin; chule ama gaosap changte chu suhmanga umdiu ahi.

²³Mipha kalsonnaho chu Pakai thusah ahin; alampia chun ama akipah lhehjin ahi.

²⁴Ama lhutajongle kilehlhapai louhel ding ahi; ajehchu Pakaiyin akhutnin atuhjinge.

²⁵Khangdong kanahin, tunvang katehtai: ahivangin michonpha akinungsun kamukhapon, achilhahte khutdo-a apanlam kamukhapoi.

²⁶Ama a-itih-a hepina dimle hongphalji ahin, achilhahte phatthei achangun ahi.

²⁷Setna dalhanlang chule thilpha bolin, a-imatih channin cheng jingtan.

²⁸Ajehchu Pakaiyin thutandih angailun amithengte adalha jipoi, amaho tonsotna dinga kikheh ahiuve. Ahinla migilou chilhahte vang kisumang ding ahiuve.

²⁹Michonpha hon gamsung louvintin, asunga tonsotna chengdio ahi.

³⁰Michonpha ho kamsungin chihna thu aseijin, chule aleijin thutanlhah thu aseijin ahi.

³¹A Pathen dan chu alungsunga aumin, akalsona channa alhonal khapoi.

³²Migilouvin michonpha avelhijin, chule thadin aholjin ahi.

³³Pakaiyin amachu akhutna dalhapontin, athu kitanteng themosah ponte.

³⁴Pakai chu ngah-in lang, alampi chu juijin, chutile gamsung lodinga nachoisang ding ahi: migilouho akisuhmang teng, hichu namu ding ahi.

³⁵Migilou chu thanei tah-a, bong thinghing bahjamkai banga aum kamui.

³⁶Ahinla ama akitol mangtai, veuvin, aumtapoi; henge, kahol holin, ahinla akimujou tapoi.

³⁷Michamkim chu melchih inlang, milungdih chu ven, ajehchu chuche mipa kichaina chu chamna ahi.

³⁸Ahinla suhkhelna neiho chu thakhatna kisumang diu, mikhang gilou kichaina chu, suhmanga umding ahi.

³⁹Ahivangin michonpha huhhingna chu Pakaiya ahin; lungkham laija atha hatnao ama ahi.

⁴⁰Chule Pakaiyin amaho apanpi-a ahuhhing ding, aman khangitlouho-a kona ahuhdoh-a, chule ama atahsan jeh uva, amaho ahuhdoh ding ahi.