Read Thado Chin Labu 39 Bible Online

Labu 39 - Thado Chin bible

Labu 39

¹La lamkaipa henga, Jeduthun henga, David Labol Kaleija kachonset lounadin kalampiho-a kihong phange, kati; migilouho kamasanga aumlaijun kakamhi kamdalin tuhchah inge.

²Apha-a konin jong thipbeh-in paolouvin kana umin; chule kalung gimna apong bepmin ahi.

³Kasunga kalungchang asadoh-in, lung kangaito laijin, meijin akongdohtan; chuin kaleija thu kaseijin ahi.

⁴Pakai, kanikhoho teptena le kaki chaina hedin neisemin, chutile itobanga thalhom kahi hetange.

⁵Vetan, kanikho hohi khutpeh chanbep bangin nasemin, chule kahinkhohi namasanga imacha hilou ahi; Tahbeh-in mitinhi aphat pettah laijong abona ahomkeo bou ahi. Selah

⁶Tahbeh-in mitinhi ahomkeova vahlea ahiuvin; tahbeh-in amaho ahomkeova lunglinglao ahiuve; aman haonaho ase khomin, chule kon ahin lokhom ding ahepon ahi.

⁷Chule Pakai tu-a hi ipi kanga em? Kakinepna nanga uma ahi.

⁸Ka suhkhelna jouse-a konin neihuh doh-in; mingol ho noisedin neisem hih-in.

⁹Nangma bol anahijeh-in kana paomon, kakam kanakehpoi.

¹⁰Namivohna keija konin ladohtan, nakhut gua athipai ja kahitai.

¹¹Mi akhangitlou jeh-a napho-a nasuhdih teng, ahoina chu nget banga nejoudin nasemji, tahbeh-in mitinhi pannabei ahi. Selah

¹²Vo Pakai, kataona ngaijin, chule kakounahi neijah peh-in; kamitlhi lonhi neithipsan hih-in, ajehchu keima kapu kapateu banga nangma toh kholjinle khopembou kahi.

¹³Kachemanga, kaumtah lou ding masanga, katha akiledoh theinadin, O neikhongai tadin.