Read Thado Chin Labu 40 Bible Online

Labu 40 - Thado Chin bible

Labu 40

¹La Lamkaipa henga, David Labol Thohhat tah-in Pakai chu kangah-in; chule aman ana eisunpeh-in, kakouna ajatai.

²Aman kokhuh gimneitah-a konle bonlhoh lah-a konin jong eiloidoh-in, chule songpi chunga kakengin eidinsah-in, kachena dingho eisuhdet peh-in ahi.

³Aman i-Pathen'u pachatna dingin jong lathah khat kakamsunga eikoipeh-in; mi tampin hichu amuva akichatdiu, chule Pakai chu atahsandiu ahi.

⁴Mihoitho hole joulama kiheite ngaisahlouva, Pakaiya atahsanna kisem mi chu anunnom ahi.

⁵Vo Pakai ka Pathen, thil kidang nanabol ho leh keiho lam nangaitona hohi atamlheh-in, hicheho chu nahenga kisimdoh joupontin; hicheho chu phondoh-a seiding tileng simjouhoi hilouding ahi.

⁶ Ganlhaina leh thilpeh nangailu pon, kakolho neihonpeh tan; govam thilto leh chonset thilto jong nangailu poi.

⁷Chujouvin keiman ven kahunge kati; lekhajol bu-a chun kachung chang thu akisune,

⁸vo ka Pathen, nalunglhaina bolding katha anomin; henge, nadan thu chu kalung sungah aume.

⁹Houkhom na loupitah-a chun chonphatna thu kalhangsapmin; vetemin vo Pakai, kakamhi thip ponte ti nahei.

¹⁰Nachon phatna kalungsunga kaselpon; nakitahnale nami huhhingna keiman kaphonglen; nalungset ngailutna le nathudihna chu mipi kikhom tamtah lah-a chun ka-im jipoi.

¹¹Vo Pakai nami hepina lutah chu keija dingin it hih-in; nangailutna leh nathutah-in neivetup jingin.

¹²Ajehchu simjoulou setna-in eiumkimvelin; kakhan gitlouna chun eituh-in, chutichun kadahdoh theitapoi; hicheho chu kalua sam jangho sangin atamjon, hijeh chun kalungthimin eilosam sahtai.

¹³Vo Pakai, lungset tah-in neihuhdoh in, vo Pakai, eipanpidin kikinno loijin.

¹⁴Kahinna manthah sah ding go-a holho chu jahchale maimoh-in umhen, kasetna ding ngaitoho chu kinungno kitnu henlang jahchao hen.

¹⁵Ajachat manuva aha, aha, eitihou kipaman chu manthah na hihen.

¹⁶Nangma naholte jouse chu nanga kipah-uhen lang thanomuhen; nami huhhingna ngailuho chun tanglouvin Pakai chu choi-atnin umhen, tiuhen.

¹⁷Ahinla keivang vaichale lhasam kahi, ahinla Pakaiyin keimading agelnai, nangma eipanpile eihuhdoh-a nahin, vo ka Pathen, geisang loujenin.