Read Thado Chin Labu 42 Bible Online

Labu 42 - Thado Chin bible

Labu 42

¹La lamkaipa henga, Korah Chapate Labol Sitwi ngaija sakhichal haisama bangin, vo Pathen nangma ngaijin kahinna hi ahaisam-e.

²Kahinna hi Pathen, Pathen hing ngaijin adangchah-e; itih tahle kahunga Pathen anga kakilah dingham?

³Kamitlhi hi sunle janna ka-an ahin; amahon kahengah tanglouvin na Pathen hoibaham? eitiuvin ahi.

⁴Hiche thilhohi kageldoh tengle kahinna kasungah kabunglha ji-e; ajehchu mipi lah-a kachen, amahotoh kipana le vahchoina aw tothon Pathen in'a kacheuvin, nitheng nitna mihonpi chuto kahiuvin ahi.

⁵Vo kahinna, ipi dinga nangma kisonlha-a nahim? chule ipi dinga nangma lung olmoa nahin? Nangma Pathen'a kinemmin, ajeh chu amaiso-a kithopina jeh-a ama kavahchoi ding ahi.

⁶Vo ka Pathen, kasunga kahinna hi alengvaijin; hijeh chun Jordan gama kon, Harmon munsang ho-a kon, chuleh Mizar lhanga konin nangma geldoh inge.

⁷Natwi lon gin'a chun twithuh le twithuh akidongton, natwi kinong le husa gin chun eichuptan ahi.

⁸Hijongle Pakaiyin alungset ngailutna chun sunle thu pentin, janle ala chun eiumpi ding, chule kahinna Pathen henga chu katao ding ahi.

⁹Keiman Pathen kasongpi henga chu ibolla neisuhmil ham? kamelmate suhgentheina jeh-a ibola lunghemma vahlea kahim? katiding ahi.

¹⁰Kagusunga chemjam um banghelin, kamelma ten i-sah louvin eibolun; niseh in kahenga na Pathen hoiba ham? atiuvin ahi.

¹¹Vo kahinna, ibolla lengvaija nahim? Chule ipidinga kasunga lung olmoa nahim? Pathen'a kinemmin, ajehchu kamel eidamsahpa le ka Pathen, ama chu vahchoi nalaiding kahi.