Read Thado Chin Labu 44 Bible Online

Labu 44 - Thado Chin bible

Labu 44

¹Korah chate dinga Maschel'in la lamkaipa henga asei Vo Pathen kapu kapa teovin khangluilaija nanatoh nathilbol einahilu chu, kanakhang houvun kajauvin ahi.

²Nangin nakhutna Pathen hephalouho chu nanano manga, chule kapu kapateu chu naphudetna, chuche gam miho chu iti nasuh gentheija, napaidoh jeng hitam.

³Ajehchu amahon achemjamuva gam chu alah uva alou ahipon, ahiloule aban thahatnuva kihuh hinga jong ahipouvin; hinla achunguva nakipa jeh-a nabanjet le namai vah-a konjoh ahi.

⁴Vo Pathen nangma kalengpa nahi, Jacob huhdohna dingin thu pe-in.

⁵Nangma jala kamelma teo kasot kundiu ahin; namin jala keiho douna-a kipatdoh ho chu kachotpha diu ahi.

⁶Ajehchu kathalpi hi katahsan pon, ahilouleh kachemjamin jong eihuhdoh ponte.

⁷Ahinla kamelma teova konin nangin neihuhhing jouvin, chule eihot bolteu chu najumso jotan ahi.

⁸Nilhum keijin Pathen jenga kisongung kating, chule namin chu tonsotnin vahchoi uvinge. Selah

⁹Ahinla nangin neipaidoh-un, neijumso taovin; chule kagalsat mite toh nakondoh khom tapoi.

¹⁰Melma-a konin nangin neikinung lesah-un, chule eihotbol teo chun amahodin thil akichomuvin ahi.

¹¹Nangin Pathen hephalouho lah-a neithe cheh-un, nehdinga kigong kelngoi bangin neipedoh taovin ahi.

¹²Namitehi imalouvin najohdoh-in, aman nu jong haonan nanei chom dehpoi.

¹³Nangin kaheng kakomhou noise din neisemun, kakim vel uva miho musit le nuisat nin neiumsah taove.

¹⁴Nangin Pathen hephalouho lah-a seichah dingle, miho lah-a lu thinkhum din neisem taovin ahi.

¹⁵Lunggimna tanglouvin kamasanga aumjingin, chule kamai jong jachatnan akhu tan ahin,

¹⁶Ajehchu melmale phulapa i-sah louna le taitomna aw-so jeh chu ahi.

¹⁷Hichengse chu kachunguva alhungin, ahinla nangma kasumilkha pouvin, chule nathu lhuna jong kapalkeh khapouvin ahi.

¹⁸Kalungthimu akile hei pon, kakalseu jonghi nalampi-a konin apetmang khapoi.

¹⁹Ahivangin nangin dragonho mun'a neisuchip deh-un, thina le-lim chun neikhu uvin ahi

²⁰Ka Pathen'u min chu kasuhmil uva, gamchom pathen henga kakhut kajahdoh uva ahile;

²¹Pathen'in hiche chu aholdoh louding ham? ajehchu aman lungsung thuguhho chu ahen ahi.

²² Henge, keiho nangma jeh-in nilhum keijin eikithat jingui, thadinga kigo kelngoi bangin eikisim taove.

²³Vo Pakai khangin, ibola imua nahim? kithouvin tonsotnadin neipaidoh loujenun.

²⁴Ipijeh-a namai naselmanga, chule eikibol gimnaole eiki suhgenthei naohi nasuhmil hitam?

²⁵Ajehchu kahinnao hi leivui lah-a akunin, ka-oiju hi leisetna abehtan ahi.

²⁶Eipanpi diuvin kipatdoh-in, chule nahepina jal-in neilhat doh-un.