Read Thado Chin Labu 49 Bible Online

Labu 49 - Thado Chin bible

Labu 49

¹La lamkaipa henga Korah chapate La Nanghon mipite jousen hichehi ngaijunlang, vannoi'a cheng nangho jousen nanau hin sungun.

²Misangle minem, ahaole avai, kigomin hichehi ngaijuvin.

³Kakamin chihna thu seijintin, chule kalung ngaito chu hetkhen themna thu hiding ahi.

⁴Thulem thuah kana sungin ting, kathugil sei chu selangdah-in hilchen inge.

⁵Nikho phatlou lai, kakhotal ho-a khanset na-in eiumchah teng ibola kakichat ding ham?

⁶Anei agouvu tahsan ho, chule ahaona houva kisongho chu;

⁷koimachan iti nama jongle asopi alhat thei louheldiu, Pathen henga ama lhatdohna dingjong apehthei louheldiu ahi.

⁸(Ajehchu alhagaovu lhatdohna ding chu manlutah ahin, hichu a-imatih chana dinga kikhah ahitai).

⁹Ama chu a-imatih chana hingjinga, chule thina jong atepkhah louding ahi.

¹⁰Ajehchu aman michingho jong athiu amun, hitobangma chun angola milungselho jong amangthah-in, anei agouho midangho adalhahpeh jiuve, ti amutan ahi.

¹¹A-in hou chu a-imatih chana umjing ding bangle achennao munho chu akhang houva umjing ding bangin, asunglamuva agelun, chule agamu chu amaho mincheh asah jiuvin ahi.

¹²Hijeng jongle mihem hi jatah-in aumjing jipon, ama chu amangthah ji gamsa tobang ahi.

¹³Hiche alampiuhi angolnao ahin; hinla, asonhouvin amaho thusei chu aphochenun ahi. Selah

¹⁴Kelngoi bangin lhankhuh-a alumin, thinan amaho chu avahding, chule jingkah lamle michondih hon achunguva vai ahomdiu; chule achen naova kona ahoinau chu lhankhuh-a mangthah ding ahi.

¹⁵Ahinla Pathen'in kahinna hi lhankhuh thanei na-a kona alhatdoh ding ahi: ajehchu aman einasan ding ahi. Selah

¹⁶Mi khattou ahung haova, a-insung loupina chu ahungkhan cheh cheh tengle nangman kicha hih-in;

¹⁷Ajehchu chu ama athi tengle imacha apohtheilou ding ahin, aloupina chun ajui louding ahi.

¹⁸Adamlaijin ahinna ho chu amale ama phatthei kiboh jongle, nangman nangmatah dinga thilpha nakibol tengle min navahchoi diu ahi.

¹⁹Ama apateu chilhah ho henga chentin, a-itih-a khovah amulouding ahitai.

²⁰Mihem choi-at changa, ahia hetkhen themna neilou chu amangthahji gamsaho bangbep ahi.