Read Thado Chin Labu 50 Bible Online

Labu 50 - Thado Chin bible

Labu 50

¹Asaph Labol Hat chungnung Pakai Pathen chun thu aseitan, leiset hi niso-a pat nilhum geijin akouvin ahi.

²Zion'a konin Pathen hoi chamkimna chu avahdohtai.

³I Pathen'u chu hungintin thipbeh-in umponte; Amasanglam chu meijin halvam intin, chule akimvel chu huile go kitho hiding ahi.

⁴Aman amite thu atan theina dinga, vanho chule leiset pumpihi chungsanga kona akoukhom ding ahi.

⁵Ganlhaina-a keima toh kitepna nei kami thengte chu kahenga hinkhomin.

⁶Chule vanho hin achonphatna chu aphon doh ding ahi; ajehchu Pathen amatah chu thutan ahi. Selah

⁷Vo kamiteho ngaijun, keiman thu seijinge: vo Israel, chule nangma nahin hilchen inge, Keima Pathen, na Pathen'u chu kahi.

⁸Kamasanga tanglouva umjing nagan lhainaho le nagovam thilpehho jeh-in nangma naphohsal ponge.

⁹Na-in'a konin bongchal chule nahonga konin kelchal himhim ladoh ponge.

¹⁰Ajehchu gamlah-a gamsa jouse chule lhangho jouse chunga gancha jouse keija ahi.

¹¹Molsang ho-a chungleng vacha jouse kahesoh keijin, loulaija gamsaho jousehi keija ahi.

¹²Kagil akela ahijongle nahenga seiponge; ajehchu vannoi leiset leh asunga thil um jouse keija ahi.

¹³Bongchal ho sa kaneh-a ahiloule kelchaho thisan kadon ding ham?

¹⁴Pathen hengah thangvahna peuvin, chungnung pen hengah nakitepnao lhutjouvin.

¹⁵Chule lungkham nile neikouvun, keiman huhdoh ingting chule nangin neichoi-at ding ahi.

¹⁶Ahinla Pathen'in migilou hengah, kadan kisunho naphon doh-a ipi-a napan sah-a, ahiloule ija pang dinga kathulhun nakama nakoiding ham? ati.

¹⁷Kihilna nahotna kathuho nanung lama napaiji kamun ahi.

¹⁸Gucha namule ama chu najopmin, chule mijonghotoh chan nanei khomjin ahi.

¹⁹Nakam chu setna-a napedoh-in, nalei chu lhep lhahnan nasemtoh-e.

²⁰Natoumun in nasopi douna thu naseijin, nanu chapatah chu naseisejin ahi.

²¹Hichehohi nabolin, keima kathipbeh-in, nangin nang tobangin neingaiton ahi. Ahinla keiman kaphosala hihochu namitmu tah-a katahlang ding ahi.

²²Tun nangho Pathen sumiltehon, hichehi ngaito phaovin, achutiloule ahal halla kabotel uva, nahuhdoh diu umlou ding ahi.

²³Vahchoina thilto banga toh chanchun keima eichoi-at ahin; chule ahoulimna kisemtohpa henga chu Pathen mi huhhingna kavetsah ding ahi.