Read Thado Chin Labu 51 Bible Online

Labu 51 - Thado Chin bible

Labu 51

¹ Bethseba Henga Achenung, Nathan Themgao hungjouva, La Lamkaipa Henga David Labol Vo Pakai na ngailut phatna dungjuijin neihepin lang, nami hepi haotah dungjuijin kasuh khelnaho noimangin.

²Kakhan gitlouna-a konin neisil ngim selinlang, kachonsetna-a konin neisuthengin.

³Ajehchu kasuh khelnaho kakihet nin; chule kachonsetna chu kamasanga aumjingin ahi.

⁴ Nangman thu naseiteng them nachan theina dingle, thu natan teng akichet theina dingin, nangmatah dounan kachonsen, hiche thilse hi namitmun kana boltan ahi.

⁵Vetan, gitlouna-a anakijila kahin, chule kanun chonset na-a einavop ahi.

⁶Vetan, nangin asung gil lama thutah chu nangailun; chule lunggil lama chu nangin chihna thu neihetsah ding ahi.

⁷Hyssop'in neisuthengin chutile ngimtange; neisilin chutile buhbang sanga kaban joh ding ahi.

⁸Nasuh bohsa guho akipana diuvin, kipana le thanopna chu neijah sah-in.

⁹Kachonsetna ho-a konin namai selin, chule ka gitlouna jousehi noimangin.

¹⁰Vo Pathen, keima-a lungtheng khumin lang, kasunghi lhagao dihtah-in semthah-in.

¹¹Naum na-a konin neipaidoh danlang, keija konin nalhagao theng ladoh hih-in.

¹²Nami huhhingna kipana chu neipekit ninlang, chule nalhagao hongphal tah-a chun nei tuhdet jingin.

¹³Chutengle suhkhel neiho chu nalampi hil ingting, chule michonse hon alungu nangma heng lamma ahin aheidiu ahi.

¹⁴Vo Pathen, nang eihuh hingpa Pathen, thisanso mona-a konin neihuh doh-in chutile kalei hin nachon phatna aw thongin lan sante.

¹⁵Vo Pakai nangin kakamhi kat sah in, chutile kakamin navahchoina aphonjal ding ahi.

¹⁶Ajehchu nangin ganlhaina nangaichapoi; chutilou hile kapeh ding nahin, nangma govam thilpeh-a jong nalunglhai pon ahi.

¹⁷Pathen'in adei ganlhaina chu lhagaova kisuhchip hi ahin; Vo Pathen, lungsung pohkeh le kisih ho chu nangin nahsah louva nakoi louding ahi.

¹⁸Zion dinga apha nadeilamtah chu bolin, Jerusalem kulbang chu saphan.

¹⁹Chutengle chonphatna ganlhaina, govam thilpeh chule govam thilto pumpi-a chun lunglhai tan natin; chutengle namaicham chunga chun abongchal hou chu hintoh taovinte.