Read Thado Chin Labu 55 Bible Online

Labu 55 - Thado Chin bible

Labu 55

¹David La bol Vo Pathen, kataona-a nana hinsungin; chule kathumna-a konin nangma kiselmang hih-in.

²Kakoma uminlang, chule kataona nei ngaipeh-in, kagenthei na-a kalunghemin, hichun eisunoh phah-in,

³Melma aw jehle migiloupa suhgentheina jeh-in na satah-in kamaovin ahi. Ajehchu khan gitlouna kachunga eisekhumun, chule lunghang tah-in eihot boluvin ahi.

⁴Kalungthim sunggil lamhi analheh jengin; chule thina kichat umtah chu kachunga achutai.

⁵Kichatna le kithinna kachunga ahung lhungin, chule kichatna melse tah-in eichuptai.

⁶Chule keiman kaseije, O keima vakhu banga lhaving nei hitaveleng! lengmang ingting gakicholdo tange.

⁷Veovin, gamla tah-a vah lengting, gamthipma kaumding ahi. Selah

⁸Huipi hattah le khopihuija kona hoidohna dingin kikin nonge.

⁹Vo Pakai aleiju sukhen inlang, sumangin, ajehchu khopi sunga khun hunam le kinahna kamun ahi.

¹⁰Sunle jan-in chua kulbang chunga chun amaho avahle leuvin, asunga chun lungkhamna le thilphalou jeng aumin ahi.

¹¹Alah uva chun khan gitlouna aumin; lheplhahna le doha bolnan akhosung lamlen adalha khapoi.

¹²Ajehchu eiseisea chu melma ahipoi; hijo ngaple kathoh joujoh ding ahi. Keima douna-a ama kiloupi sahpa jong chu eihotbol ahipoi; hijo ngaple ama-a kona kiselding kahi.

¹³Ahinla kakibahpi mi, eipuija, chule kamelhet mi, nangma nahi,

¹⁴kithu hilna ngeitah ingaikhom jin, chule Pathen houin'a ichekhomji-e.

¹⁵Thinan achungu lhunkhum hen, chule thikhol khulah kumsuh loijuhen, ajehchu gitlouna chu achennao le alah uvah aume.

¹⁶Keivangin Pathen kou vingting, Pakaiyin eihuhhing ding ahi.

¹⁷Jingkah le nilhah, chule sunnin taovingting, hatah in saminge; Chule aman ka aw ajahding ahi.

¹⁸Eidounao galmuna konin aman kahinna mongtah-in eihuhdoh-in ahi; ajehchu eidouho chu tamtah ahiuvin ahi.

¹⁹Pathen, khanglui laija umjingpa tahchun, ngaijintin, abol hesohdiu ahi. Selah Ajehchu amahon kikhelna aneilou jeh-un Pathen agingpouve.

²⁰Amatoh kichamna neiho dounan akhut alhangin, akitepna chu asukehtan ahi.

²¹Akama thuho chu bongnoiha sangin analjon, alungsungla kidouna bou ahin; athuho chu thao sangin ajoljon, ahinla chemjam kisatdoh ahiuve.

²² Napohgih Pakai chunga seplhan, aman napanpi ding ahi; Aman michonpha chu suhling dingin itih hijongle phal ponte.

²³Ahinla vo Pathen, nangin amaho chu manthah na kokhuh sunga napuisuh ding; thisanso mile milhem lhaho chu anikhou kehkhat jong hing joulou dingu ahi; Hijongle keiman nangma katahsan ding ahi.