Read Thado Chin Labu 59 Bible Online

Labu 59 - Thado Chin bible

Labu 59

¹ David taona La Vo ka Pathen, kagalte-a konin neihuh doh-in, eidouva dinga kipatdoh ho-a konin neihuh doh-in.

²Khan gitlou bolho-a konin neihuhdoh in, chule thisanso mi-a konin neihuh hingin.

³Ajehchu vetan, amaho kahinna ngah-in aumjingun; Vo Pakai kasuhkhel jehle kachonset jeh jong hilouvin, mihat ho chu keima dounan akikhomun ahi.

⁴Kasetna beijin akigouvin alhaijun ahi. Ven kithoudoh inlang eipanpin.

⁵Hijeh chun vo janel Pakai, Israel Pathen, Pathen hephalouho vildin thouvin, mikitahlou suhkhel neihohi khatcha jong hepihih helin. Selah

⁶Nilhahle ahung kileuvin uicha bangin apeng setsot jiuvin, chule khopi chu avelvel jiuve.

⁷Veovin amahon akamuvin aphong doh-un; amuh uva chemjamho aumin; hitichun, koiham ajah-a? atiuve.

⁸Ahinla vo Pakai nangin amaho chu nuisatjon natin, Pathen hephalouho chu nuijat nan neijinate.

⁹Atha hatna jeh-in nangma ngah inge; ajehchu Pathen kakihonbitna ahi.

¹⁰Eihepi Pathen chun eihoidoh intin, Pathen'in kamelmate chunga kangaichat eimusah inte.

¹¹Amaho chu that hih in, ajole kamiten sumil getnunte, vo Pakai kalum dalu, nathaneina in thecheh inlang loi nemin.

¹²Ajehchu akamuva asetnao le amuh uva thuho jeh, chule athuseiju gaosapna le jouthu jeh-in, akiletsah naova matnin umuhen;

¹³Amaho chu lung hana-a sumangin, aumlouna diuvin amaho chu sumangin, chule leiset kichaini geija Pathen'in Jacob'a vai ahomchu amahon heuhen. Selah

¹⁴Chule nilhahle hungkile sah inlang; uichaho bangin peng setsot nuhen lang, chule khopi chu velleu hen.

¹⁵Amaho chu nehding holin sahle lhanga vaveisah-in, chule achim louvule phunphun taohen.

¹⁶Ahinla keiman nathahatna chu lan sangting, henge, jingkahle nahepina la gingtah in sange; ajehchu nangma lungkham ni-a kahoina le kakiselna nahi.

¹⁷Vo kathahatna, naheng-ah la sange; ajeh chu Pathen hi kahoina le eihepia Pathen chu ahi.