Read Thado Chin Labu 6 Bible Online

Labu 6 - Thado Chin bible

Labu 6

¹La lamkaipa henga, semjang abi get nei to tho-a David Labol Pakai lunghangin neipho danlang, lungphamon jong neijep hih-in.

²Vo Pakai kalhahsam jeh-in nei hepin, vo Pakai, kaguhon eichi natsoh jeh in neidamsah in.

³Kahinna jong agenthei behsehtai: ahinla, O Pakai, itihchan hiding ham?

⁴O Pakai, hung kinunglen lang kahinna huhhingin; oh nahepinaho jal-in neihuhhing in.

⁵Ajehchu thina-a chun nangma geldohna aumtapon, lhankhuh sunga nangma kon nathangvah ding ham?

⁶Kakhoisat satna-in kalel lhehtan; Janseh-in kajalkhun kijapnan kaneijin, kalupna kamitlhin kachap lhop-in ahi.

⁷Kamit jong lungkhamna jeh-in angui lhatan, Kamelmaho jouse jeh-in atehsetan ahi.

⁸ Pakaiyin kataona eingaipeh tah jeh-in; khansetna bolteho jouse kakoma konin chemang uvin.

⁹Pakaiyin kathumna eijah pehtan: Pakaiyin kataona eisanpeh ding ahi.

¹⁰Kamelmate jouse jahchao henlang thohgim lheh uhen. Hungkileu henlang photlot louvin jahchao hen.