Read Thado Chin Labu 62 Bible Online

Labu 62 - Thado Chin bible

Labu 62

¹La lamkaipa henga, Jeduthun dinga, David Labol Tahbeh-in kahinna hin Pathen angah-in, huhhing-a kaum nahi ama-a kona hung ahi.

²Amabou kasongpile eihuh hingpa ahin, ama kahoidohna ahin, keima kiling louhel ding kahi.

³Itihchan mi khat douna-a thilphalou nangaito diuham? Nabon chaova kithatgam ding nahiuvin; bang on tobang le pal chim kon tobangbou nahidiu ahi.

⁴Ama athupina-a kona sotlhah dingbou akihouvun, jouseihi athanopnao lamtah ahin; akamun phatthei aboh-un asung gilun vang agaosapmun ahi.

⁵Kalhagao, na Pathen bou ngah-in, ajehchu kagin chatna chu ama-a konbou ahi.

⁶Amabou kasongpi le eihuh hingpa ahi; ama kahoidohna ahin, keima longlou ding kahi.

⁷Pathen'a kahuh hingna le kaloupina aumin, kahatna songpi, chule kahoina chu Pathen'a uma ahi.

⁸Phat tinin ama tahsanun lang nanghon nalung thimmu a-angah sunglhaovin, Pathen chu eiho dinga hoidoh na ahi. Selah

⁹Tahbeh-in minoi nungte hi pannabei ahin, milenho jonghi jou thubuh ahibouve; khaikotna khaidin abonchauvin ahomkeo sangin ajang jouve.

¹⁰Suhgentheina tahsan hih-un, chule mohseh-a mi chom jong bolhih-un, haona apunleh, hiche chunga chun nalung koihih-un.

¹¹Pathen'in khatvei aseitan, hiche hi nivei kana jatai; thahatna hi Pathen'a ahi.

¹² O Pakai hepina jonghi nangma-a ahije; ajehchu nangman mitin anatoh dungjui cheh-in lethuhna napejin ahi.