Read Thado Chin Labu 66 Bible Online

Labu 66 - Thado Chin bible

Labu 66

¹La lamkaipa henga, La, vahchoi La Nangho gamjousen, Pathen na kipa aw thon sah-un.

²Amin jana la saovin, ama vahchoi chu loupi sah-un.

³Pathen henga, nathilbol chu iti gimnei hitam! nathilbol theina loupi jala, namelmate nahenga kipelut ding ahiuve, tin seijuvin.

⁴Leiset pumpin nangma nahouvun tin, chule nahenga la asah uva, namin vahchoi La asahdiu ahi. Selah

⁵Pathen thilbol hohi hungvetemun, mihem chate chunga athilbol hohi tijat umtah ahi.

⁶ Aman twipi tolgo asosah in, twisoh chu kengin apal galkaijun, hia chun ama-ah kakipah uvin ahi.

⁷Aman athaneina-in tonsotnin vai ahomin, amitnin namtin chu amui; dou bolho chu kichoisang daohen. Selah

⁸Vo nangho mipin, i-Pathen'u chu vahchoijun, chule apachatna awgin chu kijahdoh sah-un.

⁹Aman mihing lah-a ihinnao hi eituhdet peh-un, chule ikengu achaloh ding jong aphalpoi.

¹⁰Ajehchu Pathen, nangin neipatep un, dangka bangin nei suthengun ahi.

¹¹Nangin len sunga chun neipui lutnun, kakong uvah suhgentheina nangame.

¹²Nangin kalu chunguva mi natousah-in, keihon meilah le twilah kapal galkaijun; ahinla nangin munphatah khatna neipuilut taove.

¹³Keima govam thilpeh choija na in'a kalut ding ahin; kakitepna ho chu nangma kapeh ding,

¹⁴hichu kahesoh laitah-a kamuh-in aseidoh-a, ka kamin anaphondoh ahitai.

¹⁵Sathao tah-a govam ganlhaina le kelngoichalho gimnamtui chu nahenga toh ingting, bongchalho le kelcha hotoh tothange. Selah

¹⁶Nangho Pathen gingho jouse, hung unlang ngaijuvin, chule kahinna dinga ipi eibol peh-em phongdoh inge.

¹⁷Kakamin ama kakouvin, kaleijin ama achoi anjin ahi.

¹⁸Keiman kalungthima gitlouna kangaitole, Pakaiyin eingaipeh ponte.

¹⁹Ahinla tahbeh-in Pathen'in eingaipeh in, aman kataona aw eingaipeh tan ahi.

²⁰Kataona le amihepina keija kona heimanglouva Pathen chu nunnom hen.