Read Thado Chin Labu 69 Bible Online

Labu 69 - Thado Chin bible

Labu 69

¹La lamkaipa henga, David La bol Vo Pathen, neihuhhing in, ajehchu twi hohin kahinna gei ahin phatan ahi.

²Dinna ding umlou bonlhoh thuhtah-a chun kalhalut tan; twisoh in eichupmin, twi thuh lama chun kahunglut tan ahi.

³Kaka kanan katha acholin, kadang agotan; Ka Pathen kanga jing lai hin kamit alosam tan ahi.

⁴ Ajeh beija eihotbol te chu kalua kasamho sangin atamjouvin; dihlou tah-a suhmang dinga eigo kamelmate chu hattah ahiuvin; hiti chun kalah khah louhel chu kalepeh jin ahi.

⁵Vo Pathen, nangin kangolna nahen, chule kachonsetna ho nanga konin akiselpon ahi.

⁶Vo tonsot Pakai, janel Pathen, nangma ngahte chu keima jeh in jachat sah hih-in, vo Israel Pathen, nangma holte chu keima jal-in maimoh daohen.

⁷Ajehchu nangma jal-in keima i-sah louvin ka umin, jachatnan kamai akhutan ahi.

⁸Kasopite lah-a maljin kasohtan, chule kanu chate lah-a gamchom mi kahitan ahi.

⁹ Ajehchu na in dinga katom pana-in einechai jin, chule nahouse hon na housetnao chu keima chungah achutan ahi.

¹⁰Keima kaka ka-a chule an ngola kahinna kasuhgim tengle, hichu eiki houset nabep ahijin ahi.

¹¹Khaodip pon jong kavonin kasemtan, amahodin thuchihbep kahijitai.

¹²Kotpi phunga touho chun keima douna thu aseijun, chule jukhamho la bou kanahi jin ahi.

¹³Ahinla vo Pakai, keima vang lah phatchan nahenga kataojin, vo Pathen nahepina tamtah, nahuh hingna thutah jal chun nei ngaipeh-in.

¹⁴Bonlhoh-a konin neiloidoh inlang, neilhah lhumsah hih-in, eihot bolte leh twi thuhtah-a konin neihuh doh-in.

¹⁵Twisoh chu neichupsah danlang, twithuh chu neival lhumsah hih-in, chule kotongin jong akam eichikhum hih hen.

¹⁶Vo Pakai nalungset ngailutna hi aphatjeh-in, neingaipeh in, nahepi khotona chamkim dungjuijin kaheng lama hung kiheijin.

¹⁷Nasoh-a konin namai sel hih-in, ajeh chu lungkhamin kaume; gangtah-in neingai peh-in.

¹⁸Kahinna hin naijin chule lhatdoh-in, kamelmate jeh-in neilhat doh-in.

¹⁹Nangin eikisei setnale kajachatna chule eikija louna hohi nahen; kakidoupi jouse abonun namasanga aumuve.

²⁰Houset nahin kalungthim asukeh-in, chule lungkham na-a kadimset nin; ei khoto ding kaholin, khatchala kamupon, chule lhamon naho kaholin khatcha jong kamujoupon ahi.

²¹ Ka-an dingin gilkha eipeuvin, chule kadang chah-a kadondin lengpitwi thuh eipeuve.

²² Adokhangu chu amasanguva thang hihen, chule aphat theinadiu tahho jong chu, thang kisoh hen.

²³Amulouna diuvin amitnu thimhen lang, chule akongu chu tanglouvin kithin sah-in.

²⁴Nalungsat na chu achunguva bunglhan, chule nalunghan lungsatna chun amaho manchah hen,

²⁵ achennao chu kamhel henlang, aponbuh uva koimacha cheng hihhen.

²⁶Ajehchu nangin navoh chu abol gentheijun, chule namavona-a lungkhamho chu houlim nan anei jiuvin ahi.

²⁷Akhan gitlounao chu khan gitlouna-in belapmin, chule amaho chu nachon phatna sunga hunglut hih-u hen.

²⁸ Amaho chu hinna lekhabua konin noimangin, chule chonpha hotoh sunhal hih-in.

²⁹Ahinla keima genthei tahle lunggimtah kahin, o Pathen nami huhhingna chun mun sang-ah eikoihen.

³⁰Pathen min chu la khatnin vahchoi jingting, chule thangvah tothon choi-an inge.

³¹Hiche hin ki le tin nei bong ahiloule bongchal sanga Pakai chu alung lhaisah joh ding ahi.

³²Mi nunnemin hichu muntin chule kipahding; chule nangho Pathen hol ho, nalungthimu hingding ahi.

³³Ajeh chu Pakaiyin migenthei te angaipeh-in, chule asoh changho nahsah louvin abolpoi.

³⁴Van le leiset, twipiho chule asunga achatle thei jousen, ama chu vahchoi cheh hen.

³⁵Ajeh chu Pathen'in Zion ahuhhing ding, chule amaho chua achenuva, gouloa anei na dinguva, Judah khopiho asahdoh ding ahi.

³⁶Asohte sonho jong chun hichu ahinlodiu; Amin ngailuho chu asunga chu chengdio ahi.