Read Thado Chin Labu 7 Bible Online

Labu 7 - Thado Chin bible

Labu 7

¹Benjamin mi Cush chungchanga David'in Pakaiya lunghemna la asah Pakai ka Pathen, nangma-ah katahsan kangame, eibol gentheiho jouse-a konin neihuh doh-in lang, neihoidoh in.

²Achutiloule, eihuhdoh ding umloupetnahi, keipi bahkai banga kahina abotela, ahal hala akoiding ahi.

³O Pakai ka Pathen, hichehi kabol ahia, kakhutna khansetna uma ahile;

⁴kaki champi khat chu thilse-a kalethuh-a ahileh, (henge, ajehbeija kaki champi khat chu kamelma dinga kapehdoh ahitan):

⁵Melma chun kahinna hi bolgenthei henlang kilahjeng hen; henge, kahinkhohi, tolto lhobeh henlang, kaloupina hi leivui toh chil halhen. Selah

⁶O Pakai, nalung hanna-a, hung kipat doh-in, kamelma teho lunghana jeh-in nangma hung kidomsangin; chule nangman nathupeh banga thutandin keima dingin hung thoudoh-in.

⁷Hijeh-a chu mipi kikhomho chun nangma naum kimvel diu ahin; amaho khohsahna jal chun chungsang lama kiletan.

⁸Pakaiyin mihemte thu atanding ahi: O Pakai, kachon phatna dungjuile keija um dihna dungjuijin kathu tanin.

⁹ Oh migiloute gitlouna chu kichai hen; ahinla midihte chu tung doh-in; ajehchu Pathen chonphatna chun lungsungle lunggel apatepjin ahi.

¹⁰Eingah tupma chu, lungsung dihtah huhdohji-a Pathen'a kon ahi.

¹¹Pathen chu michonpha ho thutan ahin, Pathen chu niseh-in migilouho chunga alunghangin ahi.

¹²Amachu akilehei louva ahileh, Aman achemjam anol hema, athalpi ajet kona, kigosa dema umding ahi.

¹³Thina manchah ho jong chu amandin agongtoh demin; misugenthei ho dounan athalchang ho asemtohtai.

¹⁴Veovin, khansetna chu naosonat in anan, thilphalou chu avopmin, thujou chu ahung penglhatai.

¹⁵Aman kotong asemin, alaithuh in, akotong sema chun ama alhalutne.

¹⁶Agitlouna chu ama luchang ngeija hungkilentin, a hunam thilbol chu alujanga hung chuding ahi.

¹⁷Achonphatna dungjuijin keiman Pakai chu vahchoi jing ting, chungnung pen Pakai minin vahchoinan la sange.