Read Thado Chin Labu 72 Bible Online

Labu 72 - Thado Chin bible

Labu 72

¹Solomon Labol Vo Pathen, nathutanna chu lengpa penlang, nachon phatna chu lengpa chapa petan.

²Aman namite chu chonphatna-a thu atanna, chule nami vaichaho chunga thudih-a thu atanding ahi.

³Molsang hon namite henga chamna hinpou vintin, chule lhang neohon chonphatna ahinpoh dingu ahi.

⁴Aman milah-a vaichaho chu athu-u atanna, milhasam ho chate chu ahuhdoh ding, chule misugenthei te chu ngemsela asuhchip ding ahi.

⁵Amahon nile lha aumlaise-a akhang akhanga nagindiu ahi.

⁶Ama gohongin lei achapnou banga, hampa chunga goju banga hung ding ahi.

⁷Ama nikholaile chonphatna chu pungin tin, chule lha aumlaisea chamna bulhing setna umding ahi.

⁸ Aman twikhanglen'a pat twikhanglen gei, chule vadunga pat leiset kolmong geija lengvai apohding ahi.

⁹Gamthipma chengho chu a-anga bohkhup muntin, chule amelma teovin leivui ale diu ahi.

¹⁰Tarshish lenghole twikol gamhon thilpeh ahinchoidiu, chule Seba lengho le Seba'n thilpeh apehdiu ahi.

¹¹Henge, lengjouse a-anga bohkhupdiu, nam jousen ama ajendiu ahi.

¹²Ajehchu aman angaichaho, mivaicha le panpiding neilou mi chu atao tengleh ahuhdoh ding ahi.

¹³Aman mivaichale lhasamho ahoidoh ding, alhasamho hinna chu ahuhhing ding ahi.

¹⁴Aman amaho hinkho chu lheplhahna le hunam na-a kona alhatdoh ding, chule athisannu chu amitmua manlutah hiding ahi.

¹⁵Chule ama hingintin, ahenga Sheba sana chu kipe ding; amadinga taona tanglouva uma, niseh-a ama kivahchoi ding ahi.

¹⁶Leiset molsang ho chungvuma chun chang ga tamtah umintin, Lebanon banga aga chu kiling ding, khopi sunga miho chu leisetna hampa banga pungdiu ahi.

¹⁷Amin chu tonsotna umding ahin; amin chu nisa umlaisea umjing ding ahi: chule ama-a mitin phattheina changding; Namtinin nunnom ati dingu ahi.

¹⁸Pakai Pathen, Israelte Pathen chu nunnom hen, ama bou thilkidang bolpa chu ahi.

¹⁹Chule amin loupi chu tonsotnin nunnom hen; leiset pumpihi aloupina in lodimhen, Amen chule Amen.

²⁰Jesse chapa David taonaho akichai tai.