Read Thado Chin Labu 74 Bible Online

Labu 74 - Thado Chin bible

Labu 74

¹Asaph Labol Vo Pathen ibola tonsotna dia neipaidoh hitam? Ibola nahamhinga kivah kelngoite douna-a nalung hanna khudoh-a hitam?

²Masanglaija nachoh dohsa namipi kikhomho, nalhatdohsa nagou nam mite le asunga nachenna hiche Zion molsang hi hingel doh-in

³Kumkho-a manthah helna lama chun nakal hinsongin; melmaten engse tah-in munthenga na atongun ahi.

⁴Namelmate chu namite kikhom ho lah-a chun akitumun, aponlap hou chu melchihnadin atungdoh taove.

⁵Thing lentah ho chunga aheichaho lamma mikhat tobang ahiuve.

⁶Ahinla tun athil suiho chu thakhat tah-in, heichale sehtumin asuchim taovin ahi.

⁷Namun theng jong meijin ahaluvin, namin chena ho tollah aseplhaovin, asuboh soh hel taove.

⁸Amahon alungthimun aseijun, eihon amaho abonchan sumangu hite; gamsunga Pathen hou khomna in jouse meijin ahalvam taove.

⁹Keihon kamelchihna hou kamu tapouvin, themgao himhim aumtapon; itihchan hiding ham he-a kalah uva khatcha jong aumtapon ahi.

¹⁰Vo Pathen, itihchan melman eihouset dingu ham? Namin chu tonsotna melmaten ataitom ding hitam?

¹¹Ipidinga nakhut natuhtanga, nakhut jetlam ngeichu ibola natuh tang ham? na-opma konin lhangdoh inlang amaho khu sumangin.

¹²Ajehchu Pathen chu tonna patna kalengpa ahin, leiset lailunga huhhingna na tongji chu ahi.

¹³ Nangin nahatna-in twikhanglen chu nalheh khennin, nangin twilah-a Dragonho lu nasukeh-in ahi.

¹⁴ Nangin Leviathan luchang ahal halin navochip in, amachu gamthipma cheng miho anchah din napen ahi.

¹⁵Nangin twinah le twisoh nahom khenin, vadunglen ho jongchu nasukangin ahi.

¹⁶Sunhi nanga ahin, jan jong nanga ahi; Nangin vah le nisa nanasemin ahi.

¹⁷Nangin leiset gamgiho jouse nakoijin, nipi le phalbi nasemme.

¹⁸Vo Pakai, melmate i-sah louna le, mingolin namin ataitom naohi geldoh jingin.

¹⁹Oh, navapal hinna chu migilou mipi henga pedoh hih-in, a-imatih-in namigenthei kikhom hohi sumil hih-in.

²⁰Kitepna neija peh-in, ajehchu leiset munthim laihohi engsetna adimin ahi.

²¹O, akibolgimho chu jachatnan kilesah hih-in, vaicha le lhasamhon namin vahchoi hen.

²²Vo Pathen, thouvin lang nathuhi seitoh-in, mingolin niseh-a iti nahouset nem geldoh jingin.

²³Namelmate awgin chu sumil hih-in, nangma douna mipite husa chu tanglou helin akhang jingin ahi.