Read Thado Chin Labu 78 Bible Online

Labu 78 - Thado Chin bible

Labu 78

¹Asaph Labol Vo kamite kadanthu-a hin nana hinsungun, kakamsung thuho-a hin na-nakhangu hinsung uvin.

² Thulem seinan kam kangting, malai thu ki-im ho seidoh-ing kate.

³Inajah uva inahetsao, ipateovin eina hil hou chu ahi.

⁴Hicheho chu achateuva henga i-im loudiu, khangthah hung umdingho henga Pakai vahchoinaho le athahatna chule thilkidang ana boldohho chu ihetsah diu ahi.

⁵Ajehchu Jacob hengah photchetna aphutdoh-in, chule Israelte lah-a danthu atungdoh-in, hichu achateu ahetsah diuvin ipu ipateu thu apen ahi.

⁶Chutia chu khang hunglhung dingho, chate hungpeng dingho chun ahet diu; chutia chu amaho chu thoudoh uva achateu ahilson jing dingu ahi.

⁷Akinepnao chu Pathen'a angapmuva, chule Pathen natohho chu sumil louva, amavang athupeh ajui nadiu ahi.

⁸Apateu louchal le golkeh khangmite, alungputnu janglou khangmite, alhagaovu Pathen'a detlouho bang ahilouna diu ahi.

⁹Ephraim chaten galvon akivonun, chule thalpi akikenun, galsat nikhon akiheijun akinungle taove.

¹⁰Amahon Pathen thutep chu achingtup pouvin, adanthua chonding anompouve.

¹¹Chule aman avetsah anatohho le athilkidang bolho asumilgam taovin ahi.

¹² Egypt gam Zoan munah apateu mitmun, Pathen'in datmo umtahtah thil anabolin ahi.

¹³ Aman twikhanglen ahom khenin, chuin amaho chu agalkaisah-in, chule twiho chu alhuh-in adinsah-in ahi.

¹⁴ Amaho chu sunle meilhangin apuijin, janle meikongin apuilejin ahi.

¹⁵ Gamthipma songpiho chu akhitkeh sah-in, chule thuhtah-a kon hungdoh bangin amaho donding twi apen ahi.

¹⁶Aman songpi-a konchun luiho alondohsah-in, vadungho bangin twiho alonlhah sah-e.

¹⁷Chule gamthipma chun chungnung pen phinsetnan achonset bebe nalaijun ahi.

¹⁸ Chule amahon atahsao ngaichat an thumnan alungthimun Pathen apatepmun ahi.

¹⁹Henge, amahon Pathen douna thu aseijun, gamthip mahi Pathen'in dokhang adothei dingham? atiuve.

²⁰Veuvin, aman songpi avon, twiho ahung kikhodoh-in, vachadung chu along letset tan; changlhah jong apetheidem? amitedin sa ape theidem?

²¹Hijeh chun Pakaiyin hichu ajan, chuin alunghangin; Jacob dounan mei akongdoh-in, Israel dounan jong lunghanna ahung kongdoh-e.

²²Pathen atahsan lou jeh-u le, ahuhhingna atahsan loujeh-u ahi.

²³Aman chunga kona meilhang ho thu apeh-a, van kot ho ahonjeng vangin,

²⁴ Chule aneh diuvin mana achunguva alhahsah-in, van an chu amaho anapen ahi.

²⁵Mihemin vantil ho an aneuvin, amaho avaset nadiuvin an anapen ahi.

²⁶Aman solam hui chu van'a anunsah-in, chule athaneina-in lhanglam hui ahin puilutne.

²⁷Sa chu leivui jat bangin achunguva ajuhsah-in, vacha lhaving nei chu twikhanglen'a neldi jat tobang ahi.

²⁸Chule achennao kimvel, agebuhhou lailunga alhahsah-in ahi.

²⁹Hitichun aneuvin, avasetnui; ajehchu mahon angaichat uchu ape ahi.

³⁰Amaho ngaichatna toh akikhendeh pouvin, akamuva asaneh-u aumpetlai chun,

³¹Pathen lunghanna achunguva achun, amaho lah-a athaopenho chu athatnin, Israel pasal lhendoh ho chu asumangtan ahi.

³²Ajehchu chuche geijong chun achonse jing nalaijun, chule athil kidang bol ho jong atahsan pouve.

³³Hijeh chun akumhou mohseh-in, chule anikhohou lungkham na-in asuhbei pehtan ahi.

³⁴Aman amaho atha phatnin amahon ahinholun, chule ahung kileuvin Pathen chu ahol loi uvin ahi.

³⁵Chule amahon Pathen chu asongpiule, Pathen chungnung chu alhatdohpau ahi ahingeldoh uvin ahi.

³⁶Ahivangin akamuvin ama apahcha lhemun, chule aleijun amachu ajoulhep jiuvin ahi.

³⁷Ajehchu alungu ama lama aum pon, chujongle akitepna-a chun jong alungdet pouvin ahi.

³⁸Hijongle ama lungsetna dimset ahijeh-in, akhan gitlounao angaidamin, chule asumang pouve; henge, vel tamtah alunghana aheimangjin, alunghana jouse asodoh pon ahi.

³⁹Ajehchu tahsaphe bou ahiu ageldoh-in, khohui anunmanga hungkile kitlou ahiuchu ageldoh-in ahi.

⁴⁰Gamthipma iti alunghansah jinguva, chule nelgama iti alung phatmosah jingu hitam!

⁴¹Henge, akinung heijun Pathen alhemjiuvin, chule Israel mitheng pa chu asulung na-un ahi.

⁴²Amahon akhut ageldoh pouvin, melma-a kona alhatdohna nikho jong chu ageldohdeh pouvin ahi.

⁴³Egyp gama melchihna ho abola, chule Zoan phaija thil kidang iti abol hitam,

⁴⁴ chule aman avadunghou thisan asosah-in, chule atuisoh hou chu adonthei tapouvin ahi.

⁴⁵ Aman alah uva thousi jatchom chom asolin, hichun amaho anejouvun, chule uphoh chun amaho asumanguvin ahi.

⁴⁶ Aman amuchi hou chu lungtol apen, chule atohgau chu khaokhopi ho apen ahi.

⁴⁷ Alengpi guihou gellin asusen, chule atheiba phunghou buhbangin asumangtan ahi.

⁴⁸Aganchahou jong gelchang henga apen, chule akelngoihou keh nasatah henga chun apen ahi.

⁴⁹Aman vantil engseho asolin, alungsatna kichat umtah, alunghana le lungthahna, chule thangtom nale gentheina chu achunguva achutan ahi.

⁵⁰Alunghana lampi asem peh-in, ahinnao chu thina a konin akhendoh pon, ahinkhou chu hise apedoh jotai;

⁵¹ chule Ham Houbuh ho-a ahatnau chungnung pen, Egypt cha pengmasa jouse chu athatnin ahi.

⁵² Ahinla amite chu kelngoi banga chedoh dingin asemin, ganchahon bangin gamthipma chun alamkaijin ahi.

⁵³ Chule akichat louna diuvin bitkeijin apuijin, ahinla amelmateu chu twikhanglen'in achupgam taovin ahi.

⁵⁴ Chule aman muntheng gamgi gei, akhut jetlama anachoh molsang geijin, apuilhung tan ahi.

⁵⁵ Amasanguva Pathen hephalouho jong anodohpeh-in, chule agoulodin ahoppeh-in, Israel phungho aponbuh cheh uva achensahtai.

⁵⁶ Achuti vangin chungnung pen Pathen chu apatepmun, alunghansah uvin, aphotchetnaho achingtup pouvin ahi.

⁵⁷Ahinla akinung heijun, apateu bangin tahsan umloutah-in akhangun, kitahlouna thalpi bangin akiheimang taovin ahi.

⁵⁸Hitichun amunsang houva alunghan nachu achoh thouvun, amilim semhouvin athangsetsah taove.

⁵⁹Pathen'in hichehi ajah phatnin alunghangin, Israelte chu akidah behsehtai:

⁶⁰ chutichun aman Shiloh Houbuh, mihem ho lah-a akoi ponbuh chu adalha tan;

⁶¹ chuin aman athahatna chu sohchang din apedoh-in, chule aloupina chu melmate khutna apedoh tai.

⁶²Amite chu chemjam'a loudin jong apedoh-in, chule agou lote chunga chun alunghangtai.

⁶³Meikongin agollhanghou akavam gamin, chule anungah hou kichena himhima akipe tapouve.

⁶⁴Athempuhou chemjamin alouvun, ameithai houvin jong akapouve.

⁶⁵Chujouvin Pakai chu mi a-ihmut na-a kona hungkhang bangin ahung khangdoh-in, chule lengpitwi jeh-a mihat tah khat hung kisen abangin ahi.

⁶⁶Amelmate ale sat kitnin, kumkho-a i-sah louva umdingin akoitan ahi.

⁶⁷Chulou jong chun Joseph houbuh chu adeitapon, Ephraim phung jong alheng tapoi.

⁶⁸Ahivangin angailut Zion molsang, Juda phung chu alheng jotai.

⁶⁹Aman leiset a-imatih channa dinga atundoh bangin, amuntheng chu leng inpi sangtah ho bangin asadoh tan ahi.

⁷⁰ Aman asoh David chu, kelngoi honga konchun alheng dohtan ahi.

⁷¹Anou tamtah kai kelngoipi ho juija konin, amite Jacob phungle agoulo Israelte vahdin apuitai.

⁷²Chutichun alungthim dihtah-in amaho chu avah-in, chule akhut themna-in amaho chu analamkaijin ahi.