Read Thado Chin Labu 80 Bible Online

Labu 80 - Thado Chin bible

Labu 80

¹Asaph La bol Vo Israel kelngoi chinna chingpa, Joseph ganhon banga ana lamkaipa nangman, nana sungin, Cherubim ho kah-a chengpa nangma vah bangin vah doh-in.

²Ephraim le Benjamin miho, chule Manasseh masanga nahatna chu hintildoh-in, chule hungin lang neihuh doh-un.

³Vo Pathen, neisemthah kitnunlang, namai vahsah-in, chutile huhhing-a kaum dingu ahi.

⁴Vo janelho Pakai Pathen, itihchan namite taona douva nalunghang dingham?

⁵Nangin amaho chu mitlhi-a kisem changlhah-in navah-in, adon dingun tena lentah-in mitlhi napejin ahi.

⁶Nangin kaheng kakomhou dingin kiphinna-in neisemun, chule kamelma teo lah-a nuisat kahitaove.

⁷Vo janelho Pathen, neisemthah kitnunlang, namai vahsah-in, chutile huhhing-a kaum dingu ahi.

⁸Nangin Egypt'a konin lengpigui khat nahinpon; Pathen hephalouho nanodoh-in, hichu naphut tan ahi.

⁹Nangin ama dingin mun nasem peh-in, ajung thuhtah-in nakikhosah-in, gam leiset alosohtai.

¹⁰Lhangho chu alimin akhusoh-in, chule hiche abahho chu cedar thing phatah abange.

¹¹Abahkai hochu twipi geijin asolin, chule hiche abahho chu vadung lama asole.

¹²Ibola apal ho chu naphet lhah-a, chuche lampi jot chanin akilou hitam?

¹³Gamlah-a kon hungpotdoh ngalchangin asuse-in, chuleh gamlah-a gamsan anejou tan ahi.

¹⁴Vo janelho Pathen, katao ahi, hungkile kitnin, van'a konin hinvenlang, hiche lengpi guihi hinvilin;

¹⁵Nangman nakhut jetna naphu lengpi leihi, chule nangma dinga dettah-a nasem abahchu ahi.

¹⁶Hichehi meijin akihallhan akiphuh lhutan; namaiso-a phosal na-a amangthah taovin ahi.

¹⁷Nakhut chu najetlama mi, nangma dinga nahatsah mihem chapa chunga chun umhen.

¹⁸Chutichun nanga konin kinunghei tapouving ting; neisuhalun, chuteng keihon namin kakoudingu ahi.

¹⁹Vo janelho Pakai Pathen neisemthah kitnunlang, namai vahsah in, chutile huhhing-a kaum dingu ahi.