Read Thado Chin Labu 83 Bible Online

Labu 83 - Thado Chin bible

Labu 83

¹Asaph Labol Vo Pathen, paolouvin umdan lang, thip beh-in umhih beh hih-in, chule vo Pathen umthim hihbeh-in.

²Ajehchu vetan, namelma ten thunoh aboluvin, chule nangma hotbolte akiletsah-un ahi.

³Namite dounan amahon lungthim phalou agelun, chule naselguhte dounan akihousom taove.

⁴Hungun namkhat ahinaova konin sumangu hitin, Israel minhi geldohkit louhel nadingin bolu hite, atiuve.

⁵Ajehchu amaho lungkhat kisan akihoutoh-un, nangma dounan kiloikhomna akisem taove.

⁶Edom le Ishmael mite houbuhho, Moab le Hagar mite,

⁷Gebal la Ammon chule Amalek, Philistine te le Tyre'a chengho toh,

⁸Assur jong amahotoh apangkhom taovin, amahon Lot chate akithopiuvin ahi. Selah

⁹ Midian ho nabolna bang, Sisera nabolna bangin amaho chu bolin.

¹⁰Amaho Endor'a amangthah taovin; leisetna din eh tobang ahitaove.

¹¹ Amilen hou chu Oreb le Zeeb bangin bolin; henge, apiputeu jong Zebah le Zalmunna bangin bolin,

¹²Pathen inho chu eiho chan dingin kilah uhite, atiuve.

¹³Vo ka Pathen amaho chu chimpei bangle, khohui masanga changpol bangin semin.

¹⁴Meijin gammang akah bangle, molsangho mei kihal deujeju bangin;

¹⁵Hitichun nahuipi chun sugen theijin lang, nahuipi le gopi achun kichatsah-in.

¹⁶Vo Pakai namin aholna diuvin, amaiju jachatnan dipmin.

¹⁷A-itih-in jahchale lungdongin umsah-in, henge, jahchao henlang mangthah jengu uhen.

¹⁸Chutia chu mihem ten, nangma bouseh Jehovah minpu, leiset pumpi-a chunga chungnung pen nahi ti ahethei diu ahi.