Read Thado Chin Labu 88 Bible Online

Labu 88 - Thado Chin bible

Labu 88

¹Ezrah mi Heman La bol Vo eihuh hinga Pakai Pathen, sunle jannin na-anga kanataovin ahi.

²Kataona na-angsunga hunglhung hen; kapenna-a hin nana hinsungin.

³Ajehchu kahinnahi lungkham nan adimin; chule kahinkho hin lhan khuh lam anaitan ahi.

⁴Kokhuh sunga kumlha ho toh eikisimtha tan, thabei hel mitoh kabangtai.

⁵Nangin nageldoh kit tahlou, Mithilah-a ongthol, akithatsa lhana lum tobang kahin chule amaho nakhutna kona kisatlha ahitaove.

⁶Kotong noinungpen, muthim lah, mun thutah-a chun neikoijin ahi.

⁷Nalung hanna kachunga agihsan, chule natwi kinonghon eibol gentheitan ahi. Selah

⁸Kamel het ho chu keija konin gamla tah-a nakoimangin, amaho henga thet umtah in neisemin, khakhumin kaumin, kapotdoh theipoi.

⁹Thohgimna jeh-in kamit athimtai, Pakai, nitinin nangma kakouvin, naheng lama kakhut kajah jingin ahi.

¹⁰Mithi henga thil kidangho namusah-a, mithiho hung thouva navahchoi diu ham? Selah

¹¹Vuikhuh-a chu nalungset ngailutna kiphonga, ahiloule tahsan naumna hi manthah na mun'a kiphong ding ham?

¹²Muthima chu na thilkidang ho kihe theija, chule na nachon phatna chu suhmilna-a dim gama kihe ding ham?

¹³Ahinla vo Pakai, nahenga kap pumin kangeh-e, chule jingkah teng kataona chu naheng ahung lhunge.

¹⁴Pakai idia kahinna hi naledoh-a, idia keija kona namai nasel hitam?

¹⁵Kakhangdon apat kathohgimin athikoncha kahitai, kichat naum naho kathoh laijin, kapangjou him himpoi.

¹⁶Nalunghan gin umtah kachunga achun, kichat naum naho chun eisumang heltai.

¹⁷Hicheho chu twibangin niseh-in kavela ahungun, amahon eiumchah soh taove.

¹⁸Ngailut gol le paihola keija konin agamlatan, chule kamel hetho chu muthim lah-a aumtaovin ahi.