Read Thado Chin Labu 89 Bible Online

Labu 89 - Thado Chin bible

Labu 89

¹ Ezrah Mi Etham La bol Pakai hepinaho chu a-imatih chanin lan sangting; kakamin tahsan aumje khangjouse-a hetsah inge.

²Ajehchu hepinahi a-imatih chana dinga kisadoh ding, nakitahna chu vanmun jouse-a naphudet ding ahi, kanatin ahi.

³Keiman kamilhen chutoh kitepna kasemin, kasoh David henga kaki hahsel in,

⁴ Nachilhah a-imatih chana dingin phutdoh ingting, chule nalaltouna chu khangjousea dinga katundoh ding ahi. Selah

⁵Chule vo Pakai vanhon nathil kidang bolho avahchoi ding; nakitahna jong mitheng kikhomho lah-a umtante.

⁶Ajehchu Pakai toh tepithei van'a koi uma? Mihat chapate lah-a Pakai kibahpi thei koi umjou ding ham?

⁷Mithengte kikhopna sunga Pakai chu sangtah-a ginding, chule akimvelaho jouse lah-a jana sangpen peh ding ahi.

⁸Vo janelho Pakai Pathen, nang tobang Pakai hat koiham? ahiloule nakimvelaho lah-a nakitahna phading koi umam?

⁹Twikhanglen chunga vai nahomin, hichu ahung kinon teng nasuthip jin ahi.

¹⁰Mi khat kithat bangin, nangman Rahab chu ahal halin nasuchipmin, namelmate chu naban thahatnin nathe cheh-in ahi.

¹¹Vanho nanga ahin, leiset jong nanga ahi; vannoi le asunga um jouse hi nangma phudoh ahi.

¹²Nangin sahlam le lhanglam nasemin, Tabor le Hermon namina kipah ding ahi.

¹³Nangin ban thahat tah naneijin, nakhut chu thahatna ahin, chule nakhut jetlam chu choi-atna achangin ahi.

¹⁴Chonphatna le thudih chu nalaltouna kibulphuna ahin; hepinale thutah chu namasangah aumin ahi.

¹⁵Kipana hethema mite chu anunnom ahiuve! O Pakai, amaho namaivah-a vahle diu ahi.

¹⁶Amaho namina nilhum keija kipah diu; chule nachon phatna-a amaho choisanga umdiu ahi.

¹⁷Ajehchu nangma athahatnao loupina nahin; chule naphatna jeh-a ka ki'u choisanga umding ahi.

¹⁸Ajehchu Pakai chu ihoidoh nao ahin, chule Israel mithengpa chu ilengpao ahi.

¹⁹Chuin gaovin namitheng khat henga thu naseijin: mihat tah khat chunga panpina kangamin, milah-a kona kilhengdoh khat kachoi-an tai, nati.

²⁰ Keiman kasoh David kamutan, kathaotheng chu ama kanutai.

²¹Ama-a chun kakhut hi thahatnin umintin, kabanin jong ama ahatsah ding ahi.

²²Melman achunga hunam bolpontin, chujongle gitlouna chapan jong ama sugim ponte.

²³Chule amaikohtah-a amelmate kavoh lhuh-a, chule ama hote chu kasuhgim ding ahi.

²⁴Amavang kakitahna le kahepinan ama aumpi ding; chule kamina aki chu choisanga umding ahi.

²⁵Akhut twikhanglen chunga kangapsah ding, chule akhut jetlam chu vadunglen hochunga kangapsah ding ahi.

²⁶Aman kahenga, nangma kapa, ka Pathen, chule eihuhhing songpi nahi tia kikou ding ahi.

²⁷ Kenjong ama kachapa masapenle, leiset lengho sanga chungnung jo-a kasem ding ahi.

²⁸Kahepinan atonsotnin kivoppintin, kakitepna-in ama dettah-a adinpi jingding ahi.

²⁹Achilhah jong atonsotna umdinga kasemding; alaltouna vangam nikhoho banga kasem ding ahi.

³⁰Achate chun kadanthu apallhah uva, chule kathutan lhah banga achon lou uleh,

³¹Amahon kadan kisemho asuhkeh uva, chule kathupeh ho anitlou-uleh,

³²Chutengle asuhkhelnau jeh-a mola kajep ding, chule akhan gitlounao jeh-a jepna-a kajep ding ahi.

³³Hijeng jongle ama-a konin kalungset ngailutna hi ladoh soh hel pongting, tahsan kaumna hi thonsah ponge.

³⁴Kakitepna chu sukehpongting, chujongle kakamsunga sohsa jong khelkit ponge.

³⁵Kathenna-a khatvei kaki hahselsa ahin, David henga jouponge.

³⁶Achilhah a-imatih chana umjing ding, chule alaltouna ka-anga nisa banga umding ahi.

³⁷Hichu a-itih-a lha banga kiphutdoh ding, chule van'a hettohsah tahsan umtah banga kiphutdoh ding ahi. Selah

³⁸Ahinla nangman napaidoh-in nakidah tan, nathaonu chunga chun nalunghangtan ahi.

³⁹Nangman nasohpa kitepna chu imalouvin nabolin, alal lukhuh tolla naseplhan, nasuhminset pehtan ahi.

⁴⁰Nangin apaljouse navoh lhuhpeh-in, akulpidet chu manghel-in nalhatai.

⁴¹Chuche lam hopa jousen amachu achom mun, a-inhengho-a dingin i-sah louvin aumtan ahi.

⁴²Nangman akidoupiho banjetlam chu nahatsah-in, amelmate jouse chu nakipa sahtan ahi.

⁴³Nangman achemjam ha jong nalehei peh-in, chule galmuna chun nadindet sah tapoi.

⁴⁴Nangin aloupina nasutangin, chule alaltouna tolla naseplhatai.

⁴⁵Nangin akhangdonlai nikhoho nasuchomin, jachatna-in nakhutai. Selah

⁴⁶Pakai itih chanem? tonsotna nakisel mang ding hitam? nalung hanna chu meibanga kongding ham?

⁴⁷Kaphat hi ichana choma ham geltemin, ipidinga mijousehi panabeija nasemham?

⁴⁸Thina mulouva hingjing dinga mi koi umam? aman lhankhuh-a konin ahinna kihuhdoh thei jintem? Selah

⁴⁹Pakai malaija nalungset ngailutna, David henga nakitah na-a naki hahselna chu hoiba hitam?

⁵⁰Pakai nasohte kihouset nahi hingeldoh temin, mijouse housetna chu ka-anga kapoh hi geltemin;

⁵¹Vo Pakai namelma ten anoisenao, nathaonupa kholhahna chana ataitom naohi geltemin.

⁵²Pakai chu atonsot atonsotnin nunnom tahen. Amen, chule Amen.