Read Thado Chin Labu 9 Bible Online

Labu 9 - Thado Chin bible

Labu 9

¹La lamkaipa henga, “chapa thi” lakaija David Labol Vo Pakai, kalung pumpin nangma vahchoi jingting; nathilbol kidang jouse katah lang ding ahi.

²Nangma-a kipah-in thanominge: Vo chungnung pen Pakai, namin vahchoilan sange.

³Kamelmate anungjam tengule, na-angsunga lhu uva mangthah diu ahi.

⁴Ajehchu nangman kathemnale kachungthu navetup in; dihtah-a thutanin laltouna-a chun natouve.

⁵Nangin Pathen hephalouho naphohjin, migilou chu nasumangin; aminu chu tonsotnadin nanoimang jin ahi.

⁶Vo nangho melmate, manthah na ho chu kumkho-a din suhmangin aumin; chule nangin khopi ho nasumangin; amaho hetjingna chu amahoto amantha tan ahi.

⁷Ahinla Pakai chu tonsotna umding ahin; Aman alaltouna chu thutanna dingin adotoh tan ahi.

⁸Aman chonphatna-a vannoi hi athu atanding, aman lungthengsela mipi ho thutanna aneiding ahi.

⁹Suhgentheija umte dingin Pakai chu kiselna ahin, lungkham laija kiselna mun ahi.

¹⁰Chule nangma min heho chun atahsanu nanga angapdiu ahi. Ajehchu nangma holte chu, Pakai, nangman nadalha ngaipon ahi.

¹¹Zion'a chenghon Pakai vahchoi La saovin; Athilbolho chu mipi lah-a phongdoh-un.

¹²Aman thisan kholchilna aneiteng amaho chu ahe jingin; aman mi kineosah ho ka awgin asumil ngaipoi.

¹³O Pakai, kachunga hepina neijinlang; thina kotpi-a kona eikaidohpa, eihot te-a kona kathohnahi neigel peh-in.

¹⁴Zion chanu kotpi phungho-a nangma thangvahna jouse kamusah theina dingin, nami huhhingna-a chun kipah inge.

¹⁵Pathen hephalouho chu amaho sem kotong sunga alhalutnun; alenthang kamuva amaho keng mama a-oh jiuve.

¹⁶Pakai chu athutan lhah natohna-a hetdoh-in aumjin, migilou chu ama khutsohho ngeija a-oh jiuve. Haggaion. Selah

¹⁷Migilou chu damuna kilehlutding, chule Pathen sumil namjouse jong kilehlut ding ahi.

¹⁸Ajehchu alhasama chu suhmilin umjing pontin, migenthei te kiholna tonsotnin mangpai ponte.

¹⁹Thouvin, vo Pakai, mihem kijosah hihhelin, namitmu tah-in Pathen hephalouho thu kitanhen.

²⁰Vo Pakai, namtinin mihem bou akihi ti ahettheina diuvin amaho chu kichatsah-in. Selah