Read Thado Chin Labu 90 Bible Online

Labu 90 - Thado Chin bible

Labu 90

¹Pathen mi Mosi Taona Pakai nangma khangjousea kachennao mun nahi.

²Molsangho jouse kitundoh masang, leiset le vannoi jeng jong nasuhto masanga, tonsotna kipat tonsotgeija nangma Pathen nahi.

³Nangin mihem chu manthah na-a nakilesah-in, nangho mihem chate kileuvin natin ahi.

⁴ Ajehchu nangma mitmun kum sangkhat jonghi akichai tengleh janhi bangbep ahijin, chule janna khongah ho phat dankhat bepbou ahijie.

⁵Nangin twisoh bangin amaho nalhoh mangjin, a-ihmu bangbep ahiuvin; jingkah-a hampa khangdoh bangbep ahiuve.

⁶Jingkahteng adon doh-in akhangtoujin, nilhah lamle akisatlhan agopjitai.

⁷Ajehchu nalungsat na-a suhmang kahiuvin, chule nalunghanna-a kalung khamun ahi.

⁸Kakhan gitlounao namasanga nakoijin, guhthima kachonsetnao namai vah-a natah langin ahi.

⁹Ajehchu kanikho hou jouse nalunghannan achemang gamtan; kakumhou jong thusim kiseibangin kamangtaovin ahi.

¹⁰Kahin kumho nikho hou chu kum somsagi, chule atha hat ho chu kum somget jong ahitheije; hijongle ahatnau chu tohgimna le lungkhamna bou ahin, akisatlha loijin kalengmangji taove.

¹¹Nalungsat thaneina he-a koiham? nangma gin naum bangtah ngeijin nalunghan jong chuti chu ahi.

¹²Hitichun kalungthimu hi chihna-a kaman theina diuvin, kanikho hou simje neihilun.

¹³Hung kiheijin, vo Pakai itih chan em? chule nasohte chungchanga nalung hin heitan.

¹⁴Kahin laiseuva kakipauva kathanopna diuvin, O nahepinan neilunglhai sah loijun.

¹⁵Neisuh gentheinao nikhoho sungle, thilse kamu-u kumho sung dungjuijin neikipa sah-un.

¹⁶Nanatoh chu nasohte henga, chule naloupina chu achateu henga kilanghen.

¹⁷Chule Pakai ka Pathen'u hoina chu kachunguva umhen, chule kakhutsoh-u natoh chu kachunguva tung doh-in, henge, kakhutsoh-u natoh chu tung doh-in.