Read Thado Chin Labu 91 Bible Online

Labu 91 - Thado Chin bible

Labu 91

¹Chungnung pen munthip mun'a chenga chu, hatchung nungpen dailim noija umding ahi.

²Keiman Pakai chu, kakiselna le kakulpi ahin, ka Pathen chule ama katahsan ding pa ahi, ting kate.

³Tahbeh-in aman thangkampa thanga kon, chule hise phalou tah-a konin nahuhdoh-inte.

⁴Aman amulho in nahui jintin, chule alhavingho noi natahsan ding, akitahna chu nalumdal le napho hiding ahi.

⁵Janteng tijatna kicha tapon natin, chule suna thalchang hung lengji jong,

⁶Ahilou jongle muthima hise lang, chule sunlaija manthah na hungleng jong kicha tapon nate.

⁷Nasihlama sangkhat lhu-a, chule najetlama sangsom lhuding, ahinla hichun nahin nai ponte.

⁸Migilou kilethuhna chu namit sehseh-a navetna namu ding ahi.

⁹Ajehchu nangman kakiselna Pakai, chungnung pen chu, nangma chennan naseme.

¹⁰Thilphalou himhimin nalhun khum pontin, hise himhimin jong nachenna hinnai ponte.

¹¹ Ajehchu nalampi jouse-a nachingtup dinga, aman avantilte nangma chunga mopo dinga thu apeh ding ahi.

¹² Songa nakeng nakisuh louna dinga, amahon akhutnuva nadop dingu ahi.

¹³ Keipi bahkai le gulsum chung nachot ding, keipi gollai le dragon chu nakengto noija nachilding ahi.

¹⁴Ajehchu angailutna kachunga akoijeh-in amachu huhdoh ingting; kamin ahetjeh-a mun sanga kakoiding ahi.

¹⁵Aman eikou ding, keiman kadonbut ding; lungkham na-a kaumpia, kahuh doh-a, jabolna kachansah ding ahi.

¹⁶Hinkho saona-in lunglhaisah ingting, kahuh hingna chu kamusah ding ahi.