Read Thado Chin Labu 94 Bible Online

Labu 94 - Thado Chin bible

Labu 94

¹Phulahna neija, vo Pakai Pathen, phulahna neija vo Pathen, hung kiphong doh-in.

²Leiset chung thutanpa, nangmatah kichoisangin lang, mikilet sahho lethuhna pen.

³Pakai itihchan migilou hon, itihchan migilou hon ajodingu ham?

⁴Itihchan thil hahsaho aseidingu ham? chule khangitlou bolte chu amaho le amaho kiletsah dingu ham?

⁵Vo Pakai namite ahal hallin aheh goijun, nagouloho asugentheijuvin ahi.

⁶Amahon meithaile kholjin asat lih-un, chule pa neilouho athatnun ahi.

⁷Ahijeng vangin amahon Pakai chun mupontin, Jacob Pathen'in jong ngaisah hih inte atiuve.

⁸Mipi lah-a milungselho, nanghon hekhenuvin, chule mingol ho, nangho itihle nachih dingu ham?

⁹Kol sempa kho jalouva uma? Mit sempa kho mulouva umding ham?

¹⁰Pathen hephalouho gimbolpan, asuhdih louding ham? Mihem chihna hilpa chun, iti ahet da ding ham?

¹¹ Pakai chun mihem lunggel ho chu pannabei ahi ti ahenai.

¹²Vo Pakai nasehgimpa, nadanthu-a kona nahilpa chu anun nome;

¹³migilou dinga kokhuh kilai kahse-a, akidoupi ho nikho-a kona nacholnga sah ding ahi.

¹⁴Ajehchu Pakaiyin amite paimang hel pontin, chule agoulo mite chu adalhah lou ding ahi.

¹⁵Ahinla thutanlhahna chu chonphatna-a hung kilentin, chule lungdihpu jousen hichu ajuidiu ahi.

¹⁶Thilse bolho eidoupeh dinga koi kipatdoh-a, ahiloule khanset bolho eidoupeh dinga koi dingdoh dingham?

¹⁷Pakai chu eipanpi anahilou hileh, kahinna hi thipbeh-a ana umding ahitai.

¹⁸Kakeng kalho nale katichun, vo Pakai nahepina-in nei natuh-e.

¹⁹Kasunga lungkhamna tamtah kaneilai chun, nalhamona-in kahinna akipasah-in ahi.

²⁰Danthu-a phatlouna semdohji khan gitlouna laltouna chun, nangma toh kiloikhomna neijin tem?

²¹Michonpha hinna douna-in akikhom khomun, monabei thisan chu themo achanuvin ahi.

²²Amavang Pakai chu eihong bitna ahin, chuleh ka Pathen chu kakiselna songpi ahi.

²³Chule aman akhan gitlounao chu amahotah chunga alhutna, chule agitlou naova chu asuh manghel diu ahi: henge, Pakai i-Pathen'un asuh manghel diu ahi.