Read Thado Chin Labu 96 Bible Online

Labu 96 - Thado Chin bible

Labu 96

¹Pakaiya lathah khat saovin, leiset pumpin Pakai henga la saovin.

²Pakai henga la saovin, amin choi annun, ani anin ahuhhingna phongdoh-un.

³Pathen hephalouho lah-a aloupi, mijouse lah-a thilkidang ho phongdoh-un.

⁴Ajehchu Pakai chu aloupi-in, loupitah-a vahchoi ding ahi; pathen jouse chungvuma ja ding ahi.

⁵Ajehchu namtinho pathen jouse chu milim semthu ahin; ahinla Pakaiyin vanho asemin ahi.

⁶Amasanga janale lalna aumin, amuntheng sunga hatnale hoina aume.

⁷ Vo nangho phungtina miten Pakaiya peuvinlang, Pakai henga loupina le hatna peuvin.

⁸Pakai chu achandia lom amin loupi chu peuvinlang, thilto hinchoijun lang, ahong sunga hunglut uvin.

⁹O, Pakai chu thenna le hoina-in houvun, leiset pumpi amasanga kichauvin.

¹⁰Pathen hephalouho lah-a chun Pakaiyin lengvai apoi tiuvin, vannoi leiset jong akilin louna dinga kiphutdet ding ahin, aman chonphatna-a mitin thu atanding ahi, tiuvin.

¹¹Vanho kipah uhen, leiset jong thanom hen, twipi le asunga umjouse aodoh uhen.

¹²Loujao le asunga um jouse kipah uhen, chuteng gammanga thingphung jouse jong Pakai masanga thanom diu ahi.

¹³Ajehchu ama ahunge, amachu leiset thutan dinga hung ahi; aman vannoi chonphatna-a thu atanding chule mitin athudih na-a atanding ahi.