Read Thado Chin Labu 97 Bible Online

Labu 97 - Thado Chin bible

Labu 97

¹Pakaiyin lengvai apotai, leiset thanom hen, twikol gamho jouse kipah uhen.

²Meilhangle muthimin aumkimvelin; chonphatna le thutandih chu alaltouna kibulphuna ahi.

³Amasanga meikong ache-in, chule akimvela amelmate akavamtai.

⁴Akolphehon vannoi asalvah-in, leiset hin amun, akithing thinguve.

⁵Leiset pumpi Pakai anga, Pakai anga chun, lhangho chu khoilu bangin ajol lhan ahi.

⁶Vanhon achonphatna aphong doh-un, chule mijousen aloupina amuvin ahi.

⁷Alim semthu jenjouse le milima kison na nejouse lungdonguhen, nangho pathen jousen, Ama houvun.

⁸Zion'in ajan akipah-in, chule vo Pakai nathutanlhah jeh-in Judah chanute athanomuve.

⁹Ajehchu Pakai, nangma leiset pumpi chunga chungnung pen nahin; pathen jouse chunga choisanga um nahi.

¹⁰Pakai ngailu-a nanghon thilse hotbolun, aman amithengte hinna akheh doh-in, amaho chu migilouho khutna konin ahuhdoh-in ahi.

¹¹Michonphate din kho ahungvah tan, milungdihho din kipana ahunglhung tai.

¹²Michonpha ho Pakaiya kipah-un, chule athenna hetjingna-in ama-a thangvahna peuvin.