Read Thado Chin Thuchihbu 1 Bible Online

Thuchihbu 1 - Thado Chin bible

Thuchihbu 1

¹ Israel leng David chapa Solomon thuchih ho;

²Chihna leh kihilna hetna ding, hettheina thuho kimudohna ding;

³Chihna, thutah, thutan lhahna chule thudih kihilnaho kisana ding:

⁴Milhamho gelchet theina, khangdongpa hetnale thil hetkhen them theina pehnading ahi.

⁵Michingin ngaijin tin ahetna kibeding, chule hetthem theina nei michun themna akimuding ahi.

⁶Thuchih le aledohna hetnading; miching thusei ho le giltah-a thu kiseiho hetkhenthem theina ding ahi.

⁷ Pakai gin kitihi hetna bulpi kipatna ahin, ahinla mingol hon vang chihna le kihilna asang pouvin ahi.

⁸Kachapa napan nahilna ngaijin, chule nanu thupeh chu nahsahmon koihih-in,

⁹Ajehchu hicheho chu naluchanga dinga kijep hoina hiding, chule nangonga dinga khivui tobang hiding ahi.

¹⁰Kachapa, michonse hon jollhah ding nagot tenguleh nomhih helin.

¹¹Amahon naheng-ah, hungin keihotoh thisanso ding ngah-u hitin, mona neilouho chu ajeh beijin guhthimin changu hite atiuva ahileh,

¹²Kokhuh sunga lhalut ho bangin, eihon amaho khu ahing sanun, apumchangin lhankhuh sunga vallutnu hite.

¹³Eihon chutia chu thillu jouse ikimudoh dingu, thil kichom doh-a chu i-in'u idipdim dingu ahi.

¹⁴Keiholah-a navang hung kisanin; ibonun sumdip khat neikhomu hite.

¹⁵Kachapa amahotoh alamlhah uva chekhom hih-in; amaho lampia konin nakeng tuhtangin.

¹⁶Ajehchu akenghou chu aselama alhaijin; chule thisan sona lamah ajangkai uvin ahi.

¹⁷Tahbeh mongin vacha jouse mitmun panna beijin len chu akijal tan ahi.

¹⁸Chule amahon amahole amaho thisan kiso dingjoh angah-un; amahole amaho hinkhojoh chu guhthimin achangun ahi.

¹⁹Mipapseho lampi chu chutobang ding ahibouve; hichun aneiho tah hinkho jongchu alamangjin ahi.

²⁰ Chihnan lamlhong dunga asamlen, amanun lamkon tinchenga awthongin asamlelen ahi.

²¹Amanun lamthompi dungle kotpi lutna ho-a alhang samlen, khopi sunga amanun thu hitihin aseije,

²²Nangho milhamhon, itihchan milhama umding nangai nahlai dingu ham? chule mitaitom ho amitaitom naova thanom jinguva, chule mingolten hetna ahotnahlai dingu ham?

²³Kaphosalna hi nanghon ngaijun: veuvin, keiman nachung uva kalhagao kahin buhlhah ding, chule kathu kahin hetsah ding nahiuve.

²⁴Ajehchu keiman kakouvin, nangho nanom pouve; Keiman kakhutnin kahinsangun, koiman nei ngaisah pouve.

²⁵Ahinla kahilna jouse nanghon lahlou nahisah taovin, chule kaphosalna jong iman nasep pouve.

²⁶Keiman jong nangho hamsetna chu kanuisat ding, natijat nao ahunglhun teng nahsah-a kaneilou ding;

²⁷Natijat naochu manthah na banga ahunglhuna, chule nakisuhmang naochu chimpei banga ahung lhunteng, gentheina le lungdonna nachung uva ahungchuh tengleh khohsahna kanei louding nahiuve.

²⁸Chutengle amahon thonlouva keima eihinkou dingu, hijongle keiman kadonbut louding; amahon keima eihinhol loi dingu, hijongle eimudoh loudingu ahi.

²⁹Achuti theina dinga amahon hetna chu anahotnu ahin, chule Pakai gin kitichu anakilhen louvu ahi.

³⁰Amahon kathumop angainom pouvin, amahon kiphosalna jong anahsah pouvin ahi.

³¹Hijeh-a chu amahon achonnau ga akineh dingu, chule athil gonhouva chu dimding ahiuve.

³²Ajehchu milhamho chu akihei mangnao chun atha dingu, chule mingol ho chu aphat theinao chun asuhmang dingu ahi.

³³Ahin koi hijongleh keima sei ngaija chu bitkeija cheng ding, chule thilphalou kichatna-a kona hoidoh teiding ahi.