Read Thado Chin Thuchihbu 10 Bible Online

Thuchihbu 10 - Thado Chin bible

Thuchihbu 10

¹Chapa chingin apa akipasah in; amavang chapa ngol chu anu dinga hesohna bep ahi.

²Khan gitlouna gouho chun koima aphatchom sahpon; ahinla chonphat na-in thina-a konin ahuhdoh theije.

³Pakaiyin michonpha hinkho chu kel thoh dinga asuhgenthei louding; amavang khan giloute thil le lo vang asuhmang peh ding ahi.

⁴Khut thase tah-a natongpa chu ahung vaichan, hinla migunchu khutnin haona amujie.

⁵Nipi laija kikholkhoma chu chapa ching ahin, ahinla chang at laija ihmupa vangchu jachat konsah chapa ahi.

⁶Phattheina chu michondih tah luchunga aumin, migiloute kamsunga vang hunama thuseijin atomchah-in ahi.

⁷Midihtah hetjingna chu phattheina ahin, amavang mikhangilou chu amin mangthah ding ahi.

⁸Milungching chun thupeh ho akisan ding, mingol moh paopao vangchu lhutei ding ahi.

⁹Dihtah-a kalsongpa chu mongtah-in achejin; alampiho-a vahveija chu hetdoh-a umding ahi.

¹⁰Amit satlaplap pachun gimna asosah-in; ahinla mingol moh paopao vangchu lhuding ahi.

¹¹Michonpha kamchu hinna twikhuh ahin; migiloute kamsunga vang hunama thuseijin atomchah-in ahi.

¹² Kihotna-in kinahna akondoh sah-in; ahivangin ngailutnan chonset jouse akhujin ahi.

¹³Hetkhenthem theina neipa kamsunga chun chihna akimudoh in; ahinla mol chu het khenthem theina neiloupa tungtuna ding ahibouve.

¹⁴Miching hon hetna akikholun, ahinla mingol kam vangchu manthah na toh naicha ahi.

¹⁵Ahaopa haona chu akhopidet ahin; migenthei ho suhgemna chu avaichatnau ahi.

¹⁶Michonpha te tohgimna chun hinna asodoh in, agiloute toh ga vang chonsetna ahi.

¹⁷Hilchahna kichintup pa chu hinna lampia aumin, ahinla phona sangloupa chu avahthai jin ahi.

¹⁸Ami hotna selgu chanchu mijou ahin, chule thujouva mi seise-a chu angol ahi.

¹⁹Thucheng tamna-a chun chonsetna alhasampon, ahin akam kihupthem thei michu miching ahi.

²⁰Midihtah lei chu dangka thengsel tobang ahin; migilou lungthim vang pannabei ahi.

²¹Michonpha kam chun mi tampi avah-in; ahinla mingol hovang chihna lhahsam jeh-in athijin ahi.

²²Pakai phattheiboh na-in haosatna asodoh sah-in; chule hiche-a chun gimna abelap pon ahi.

²³Gitlouna hi mingol dingin kichep golseh tobang ahin; ahinla hetkhenthem theina neipan chihna aneijin ahi.

²⁴Migilouvin akichat jing kichatna chu amachunga hunglhung ding; ahinla michonpha ngaichat chu kipeding ahi.

²⁵Chimpei kitolmang bangin agiloupa chu aumtapon; ahinla michonpha chu tonsotna kiphutdet ahi.

²⁶Ha dinga lengpitwi thuh, mit dinga meikhu ahibangin, mithase chu asolleho dingin chutobang chu ahi.

²⁷Pakai ginna chun nikhoho asaosah-in ahi, ahinla agiloute kumho vangchu kisuchom ding ahi.

²⁸Michonpha te kinepna chu kipana hintin, migiloute kinepna vang manthah na hiding ahi.

²⁹Pakai lampi chu midih dingin thahatna ahi, ahinla khansetna tongho dinga suhgemna hiteiding ahi.

³⁰Michonpha te chu imatihchana suhlonga umlou helding, ahinla migilou ten leiset alo loudingu ahi.

³¹Midih kamsungin chihna asodohsah-in; ahinla jouthusei lei vangchu ki-atdoh ding ahi.

³²Michonpha kamsung chun santhei ahen; ahinla mikhang gilou kamin vang jouthu bou aseijin ahi.