Read Thado Chin Thuchihbu 11 Bible Online

Thuchihbu 11 - Thado Chin bible

Thuchihbu 11

¹Khaikot dihlouva kite hi Pakai dinga thet umtah ahin, ahinla dihtah-a kite chu ama lunglhaina ahi.

²Kiletsahna ahunglhun teng, jum na ahung lhungin, ahinla mi kineosah koma chihna aum jinge.

³Mikitahte phatna chun amaho apuihoi ding, ahinla suhkhelna neiho louchalna chun amaho asuhmang ding ahi.

⁴Lungsat nikhoteng haonaho pannabei ahin, chonphat na-in vang thina-a konin ahuhdoh-e.

⁵Chamkimsel mihem chu achonphatnan lamdih-a apuiding; amavang khanggilou chu akhangit louna-a lhuding ahi.

⁶Milungdih ho achonphatnao chun amaho ahuhhing ding, amavang mi kitahlouho chu amahotah suhkhelna chun amatden diu ahi.

⁷Migilou athiteng akinepna chu mang ding ahin; chule midihlou ho kinepna chu amangjitai.

⁸Michonpha chu lungkham na-a konin huhdoh-in aumin; chule migiloupa chu michonpha pa thakhelin lungkham na-a ahunglutjin ahi.

⁹Mipha lhemin aheng akom chu akamin asumangin, ahinla hetnavanga midihtah chu huhdoh-a umding ahi.

¹⁰Michonpha ho akhantou tengle khopi akipahjin, amavang mikhangilou amanthah teng min a-eu jie.

¹¹Midih phatthei achan jal-in khopi choisangin aumjin; ahinla migilouho kamso jeh-in suhchimin aum jitai.

¹²Chihna notthapma koi mihem chun a-inheng iman agelpon; ahinla hetkhenthem theina neipa vang chun chamna akituh chah-in ahi.

¹³Guhthima thuseijin thuguhho aphong dohjin, hinla tahsan umtah mihem vang chun thuguh chu a-imjouvin ahi.

¹⁴Kithumop umlouna-a chun mipi alhujin, ahinla mithumop tamna a chun hoidohna aume.

¹⁵Gamdang mikhat dinga bat thila ama le ama kitunga chun lunggimna akimu teiding, hinla midinga bat thila kitunding nomlouva chu hoidoh teiding ahi.

¹⁶Lungsetna dim numei jin jana akilamdoh-in chule pasal thahat hon haonaho akilamdoh ji-e.

¹⁷Hepi nadim pasal'in alhagaodin napha atongin; mi engsepa vangin atahsatah ngeijong asugime.

¹⁸Agiloupan lheplhahna dimset na atongin, ahinla chonphatna muchi tupa ding chun thonlou kipana aumme.

¹⁹Chonphatna in hinna apuilut bangin, thilse delpa chun amatah thina dinga adel ahi.

²⁰Khangitlouna lung puho chu Pakai dinga thet umtah ahin; chutobanga chu nolnabei miho lamdih-a acheu chu ama lunglhaina ahi.

²¹Migiloute khat le khat akhutnun kituhto jongleu talen manlouva umloudiu; ahinla michonpha chilhah vang kihuhdoh ding ahi.

²²Numei melhoitah hetthem theina neilou chu, vohpi nahkuija sana thengsel kibapeh tobang bep ahi.

²³Michonpha lungdei chu aphalam jengbou ahin; amavang migilou kinepna chu lungsatna ahibouve.

²⁴Mihem khatnin manbeijin ahomdohjin, hinlah akhangtouvin ahaocheh cheh jin; mihem khat apehdingdol jong pelouva it aumin, hinlah hiche chun vaichatna lam alhutjon ahi.

²⁵Mihongphal hinna chu suhthaova umding; chule midinga twi chappeh chan chu ama jong kichap pehding ahi.

²⁶Ahop ding chang itna michu mipin agaosap ding, ahinla chuche johdohpa lujanga chu vangbohna chuding ahi.

²⁷Gunchu tah-a apha holpa chun khohsahna akimudoh-a, thilphalou holpa henga vang ase hunglhung ding ahi.

²⁸Ahaona-a kisongpa chu lhutei ding ahin, ahinla michonpha vang thingbah banga khangtou ding ahi.

²⁹Ama insungtah suboipa goulo chu hui hiding; chule mingol chu milungchingpa soh-a pangding ahi.

³⁰Chonphat ga chu hinna thingphung ahin; chule lhagaoho huhhingpa chu miching ahi.

³¹ Veuvin, chonphate chu leisetna lethuh-a umding ahiuvin, migiloute leh chonsete jongchu chuche sanga tamcheh-a kilethuh ding ahiuve.