Read Thado Chin Thuchihbu 12 Bible Online

Thuchihbu 12 - Thado Chin bible

Thuchihbu 12

¹Koi hile hilchahna ngailu-a chun hetna angailut ahin, kiphona hotbolpa vangchu mingol ahi.

²Mipha chu Pakai khohsahna achangin, ahinla khangitlou thil gongpa vangchu themmo achanding ahi.

³Phatlouna-in mikhatcha atundoh louding, ahinla michonpha te kijung khona vangchu suhlonghoi hilouding ahi.

⁴Numei chonchan pha chu a-inneipu dinga lallukhuh ahin, hinla jachatna hinlhut numei vangchu amapa ding aguho monlha tobang ahi.

⁵Michonpha lunggel ho chu adih-in, amavang mikhangilou thumop chu kijou lhepna ahibouve.

⁶Mikhang giloute kamcheng vang thisanso ding chanlhih ding thu ahin; ahinla midihte kamsungsoh vang chun amaho ahuhdoh ding ahi.

⁷Agiloute chu lekhupmin aumin, abeiji taovin, ahinla michonpha in vangchu dingjing ding ahi.

⁸Mikhat chu ama lungsung chihna dungjuija pachat hintin, ahinla lungdihlou kengpa vangchu isahlou hiding ahi.

⁹Ama le ama kijabola nehding lhasampa sangin mi i-sah louva um, ahia soh neija michu aphajon ahi.

¹⁰Michonphan agancha hinkho akhoh sah-in; ahinla migiloupa nemheuva mikhotona chu engsetna ahibouve.

¹¹Agam kilhopa chun nehle chah lhingsetna amuding, ahinla pannabei miho juilepa vangchu hetthem theina lama ahomkeo ahibouve.

¹²Mikhangilou vin miphalouho lenthang adeichan, ahinla chonphatna jungchun ga asodoh-e.

¹³Mikhang gilou chu ama thusei dihlouva chun a-oh jin, ahinla midihtah pachu boina-a kona ongdoh ding ahi.

¹⁴Akamsunga thupot vanga mikhat chu aphalama lunglhai ding, chule akhut tah-a natongpa chu atohga ama kipetei ding ahi.

¹⁵Mingolin achena lampi chu ama mitnin adih-in amun; ahinla hilchahna ngaipa chu miching ahi.

¹⁶Mingol khat lungsatna chu apettah-a kihedoh ahin, milungchingin vang jum na akhukhumin ahi.

¹⁷Thutah seidohpa chun chonphatna atah langin, ahinla hettohsah lhem vang chun lheplhahna avetsah-e.

¹⁸Chemjam'a kisun banga thusei aumin, ahinla miching thusei chu damna ahi.

¹⁹Thutah sei kamsung chu a-imatih chana kiphutdoh ding ahin, ahinla thujou seina leigui vangchu chomkhat kah dingbou ahi.

²⁰Lheplhahna hi ase gelho lunga aumjin, ahinla chamna thuhil ho-a vang kipana aume.

²¹Midihtah chunga thilse sohlou ding ahin; ahinla agilou chu setna-a dimding ahi.

²²Thujou seina kamchu Pakai dinga thet umtah ahin, ahinla thutah a kimangchaho vang chu ama lunglhaina ahi.

²³Michingin hetna akikoi tupmin, ahinla mingol ho lungin vang ngolna asamlen ahi.

²⁴Gunchupa khutnin vaihomna achoiding ahin, hinla thasepa vangchu hunama na kitohsah ding ahi.

²⁵Lungsung pohgih na-in mi alungkham sah-in, ahinla thupha cheng khatnin akipasah-e.

²⁶Michonpha chu aheng akom sangin gamchengin apha chung nungjon, hinla migilou lampi chun amaho apuimangji-e.

²⁷Mithase chun agam lenna-a atha sa chu agou jipoi, hinla agunchupa thil vang chu manlutah ahi.

²⁸Chonphatna lampia chun hinna aumin, chule chuche lampia chun thina himhim aumpoi.