Read Thado Chin Thuchihbu 13 Bible Online

Thuchihbu 13 - Thado Chin bible

Thuchihbu 13

¹Chapa chingin apa thuhilna angaijin, mi i-sah loupan vang phona angaipon ahi.

²Min akamsoh ga tuitah akineh ding ahin, hinla suhkhelna neiho hinna-in vang hunama kibol anehdiu ahi.

³Akam kituh tuppan ahinkho akivettup ahin, hinla akamtampa vang chun suhgemna ato teiding ahi.

⁴Mithasen alungin angaichan hinla aneijipoi; ahivangin migunchu pa hinna chu haosatah-a umding ahi.

⁵Michonphan joule nala thu kisei aho-in; hinla migilou vang kidah umtah ahin, jachatnan achuji-e.

⁶Lamdih-a chepa chu chonphat na-in avetupmin, hinla gitlou na-in michonse alehkhup jin ahi.

⁷Ama kihaosah-a, imacha neilou aumin, ama kivaichatsa-a neile gou tamtah neijong aumin ahi.

⁸Mihem khat hinkho chu haona-a kilhatdoh ahin, hinla vaichahon vang kiphosalna chu angai pouvin ahi.

⁹Mi chonphate vah chu akipah-in; migiloute thaomei vang kisumit ding ahi.

¹⁰Kiletsah nahin kidouna alhunsahjin, hinla kihilna pha umna-a chun chihna aume.

¹¹Lamdih louva kimu neile gou chu kemsuh teiding ahin, tohgimna-a kona kikholdoh neile gou vang chu pung ding ahi.

¹²Kinepna thonin lungsung adammo sah-in, hinla ngaichat akimolso teng vangleh, hichu hin thingphung ahi.

¹³Koi hile thu i-sah louhela koija chu suhmanga umding, hinla thupeh gingpa vangchu kipaman kipeding ahi.

¹⁴Miching dan thupeh chu hinna twinah ahin, hichu thina thangho-a kona hoidohna ahi.

¹⁵Thilpha hetthem theina chun khohsahna akimun; hinla suhkhelna neiho lampi chu ahahsan ahi.

¹⁶Milung chingin hetna akisah lelpi-in; hinla mingolin vang angolna chu atahlangin ahi.

¹⁷Thupole-a pang migilou chu boina-ah alhalut jin; hinla tahsan umtah palai chun damtheina ahinpolut jin ahi.

¹⁸Vaichatna le jum na chu hilchahna kisan nomloupa chanding ahin; hinla phona kichin thempa vang chu ja-a umding ahi.

¹⁹Ngaichat khat suhbulhit hi hinkho nopna ahin; hinla thilse-a kon kiheimang dinghi mingolte dinga thet umtah ahi.

²⁰Miching toh chekhom chu chingding ahin; hinla mingol hotoh kiloija chu suhmanga umding ahi.

²¹Setna-in michonseho anungdeljin; hinla michonpha chu phatna-a kilethuh ding ahi.

²²Mipha chun achate chate ding neile gou adalhah pehjin; chule michonse te neile gou vangchu midih ho dinga kikhol khom ahi.

²³Vaichate loulhona-a neh tamtah aumin, hinla thutanna lhahsam jeh-a suhmanga umjong aumin ahi.

²⁴Mol panlou chun achapa ahot ahin; hinla achapa ngailupa vang chun asehgimjin ahi.

²⁵Michonphan alungnachim setnin anen; hinla agiloupa vangchu gilkel ding ahi.