Read Thado Chin Thuchihbu 14 Bible Online

Thuchihbu 14 - Thado Chin bible

Thuchihbu 14

¹Numei chingin a-in akisahdoh-in; hinla numei ngolin vang akhutnin aloilhuji-e.

²Chondih tah-a kalsongpa chun Pakai agin ahin; hinla alampiho hokhelpa chun Pakai chu i-sah louva abol ahi.

³Mingol kamsunga konin kiletsahna jeng apotnin; hinla miching kamin vang amaho ahoidoh sah ding ahi.

⁴Bongchal umlouna-a gan ankong chu athengin; hinla bongchal thahat vanga ga tamtah kiso ji ahi.

⁵Tahsan umtah hettohsah chun jou seipontin; hinla hettohsah lhemchun joule nal jeng seijinte.

⁶Mi i-sah loupan chihna aholin, ahivangin amupon; hinla hetna kitihi ahekhenthem theidingin bailamtah ahi.

⁷Mingol kamsunga chihna aumlou nahetdoh tengle, ama-a konin chedoh jengin.

⁸Milungching chihna chu alampi akihetkhen themtheina chu ahin, hinla mingol ho ngolna chu lheplhahna ahi.

⁹Mingol hon chonset hi totnan amangun; hinla chonphaho lah-a vang khohsahna aume.

¹⁰Lungsungin amatah hesoh genthei chu akihetnin, chule midangin akipana-a jong chan aneipi poi.

¹¹Migilou in chu lekhupma umding ahin, hinla mikitahpa ponbuh vangchu khangtou jing ding ahi.

¹² Mihem dingin adihtobang lampi khat aumin, hinla achaina le hiche lampi chu thina lampi ahiji-e.

¹³Nuina jenga jong lungsung gimna aumin, chule hiche thanopna kichaina chu lunghemna ahijin ahi.

¹⁴Lamdih-a kon kinunghei pa chu ama lunggot lampi jenga achen, chule mipha chu chunga kon kilunglhaisah ding ahi.

¹⁵Mimolin thujouse atahsanin, hinla mi chingtheipan vang achena ding akivettup jingin ahi.

¹⁶Miching akichajin, setna adalhan, hinla mingol vangchu alungsajin chule amale ama akisong ji-e.

¹⁷Lunghangbai mi chu ngolhoi tah-in akimang chajin, chule thil gilou tamtah gongpa chu hotnin aumjitai.

¹⁸Mimolin ngolna goulo bangin alon, hinla miching vang hetna chu kikhuhpeh ding ahi.

¹⁹Migilou chu mipha anga bohkhup ding, chule migiloute chu michonpha te kotphunga bohkhup ding ahi.

²⁰Mivaicha chu aheng akom jengin jong ahon, hinla mihao chun gol le pai tamtah aneijin ahi.

²¹Aheng akom noise-a chun chonset abol ahin, mivaicha hepina neipa vangchu anunnom ahi.

²²Thilse gongho chun asuhkhelu hilou ham? hinla hepina leh thutah chu thilpha gongho-a ahi.

²³Tohgimna jouse-a aphat chomna aumin, hinla kama seitho maimai vang chun vaichatna alhutjin ahi.

²⁴Michingho lallukhuh chu ahaonau ahin; hinla mingol ho ngolna chu angol naohi ahi.

²⁵Hettohsah tahsan umtah chun hinkho ahuhdoh-in; hinla hettohsahna lhem chun jou le nal jeng aseije.

²⁶Pakai ginna-a chun kisona dettah aumin, chule achate chun kiselna ding mun aneiteidiu ahi.

²⁷Pakai ginhi hinna twinah ahin, thina thanga kona hoidohna ahi.

²⁸Mipi tamtah umhi lengpa-a dinga loupina ahin; hinla mihem lhahsamna-a vangchu lengchapa-a dia manthah na ahi.

²⁹Milung nengchun hetkhenthem theina lentah anei ahin; hinla mikino thethun angolna achoisang ahi.

³⁰Lungdamsela umhi tahsa dinga hinna ahin, hinla kithang thipna hi gule chang monsahna ahi.

³¹Mivaicha bolgentheija chun ama sempa anoise ahin, hinla ama jabol chanchun vaichate chunga khotona anei ahi.

³²Migilou chu ama gitlouna a delmangin aumin, hinla michonphan vang thina chunga jong kinepna aneijin ahi.

³³Hetkhen themtheina neipa lungsunga chun chihna achengin, hinla mingol ho lungthim sunga umchu akihedoh teijin ahi.

³⁴Chonphat na-in namkhat achoisangin, hinla chonsetna hi nampi dinga themmo chana ahi.

³⁵Lengpa khohsahna chu sottol milung chingpa chunga aumjin, hinla alunghana chu jachatna sodohsahpa chunga aumin ahi.