Read Thado Chin Thuchihbu 15 Bible Online

Thuchihbu 15 - Thado Chin bible

Thuchihbu 15

¹Aw nemheuva kidonbutna hin lungsatna aheimangin; hinla thucheng ngeimotah chun lunghanna asuthouve.

²Miching leijin hetna chu dihtah-in amangcha jin; hinla mingolte kamin ngolna ngen aphongdoh-in ahi.

³Pakaiyin munjouse amusoh keijin; ase leh apha ave jingin ahi.

⁴Kamdam awnema thu kisei chu hinna thingphung tobang ahin; hinla thugilou sei leigui vang lhagao suse-a ahi.

⁵Mingolin apan ahilchahna i-sah louvin akoijin; hinla phona kisanthem michu miching ahi.

⁶Michonpha te insunga chun neile gou tamtah aumin; hinla migilouho phatchomna vangchu boinabou ahi.

⁷Miching kamin hetna athejalin; hinla mingol lungin vang chutin abolpoi.

⁸Migilouvin kilhaina abol chu Pakai dinga thet umtah ahin; hinla milungdih taonachu ama lunglhaina tah ahi.

⁹Migilou lampi chu Pakai dinga thet umtah ahin; hinla chonphatna nung juipachu aman angailun ahi.

¹⁰Suhdihna hi achena lampi dalhapa dingin athohhah-in; chule phona nahsah loupa chu thiteiding ahi.

¹¹Thikholkhul leh manthah na chu Pakai anga aumin; achutile mihem chate lungthim jong chusanga khohcheh louding ham?

¹²Mi i-sah loupa chun aphohpa chu angailupon; ama michingte koma jong cheponte.

¹³Lungsung kipana chun kipana maiso asosah-in; hinla lungjin nahin lhagao asusen ahi.

¹⁴Hetkhenthem theina neipa lunggil chun hetna aholin; hinla mingol ho kam vangchu ngolna-in akivah-in ahi.

¹⁵Suhgentheija umte dingin nikhojouse chu aphalou jeng ahin; hinla lungkipah-a umten tanglouvin golnop anei jinguve.

¹⁶Pakai gingpuma themcha neichu, neile gou tampi boina toh neitha sanga phajo ahi.

¹⁷Kidou puma bongchal thaotah neh sangin; ngailutna puma anche me neh aphajoi.

¹⁸Lungsat kengpan kinahna achoh thouvin; hinla milung nengin kinahna asuchamin ahi.

¹⁹Mithase chenalampi chu lingtho kikaitobang ahin; hinla michonpha lampi chu lamphei ahi.

²⁰Chapa chingin apa akipasah-in; hinla chapa ngolin anu anoise-in ahi.

²¹Ngolchon kitihi chihna-a lhasampa dingin thanopna ahin; hetkhen themna neipa vang dihtah-in achon jinge.

²²Thumopna umlouna-a thil kigongho chu alhasamjin; hinla thumopthem tamna-a chun hicheho chu akimolso jin ahi.

²³Mihem chu dihtah-a donbutna akipeh jallin thanopna aneijin; chule thucheng khat aphatcha kiseidoh chu iti phatna pha hitam!

²⁴Noilam thikhol khul'a kona akiheimang theina dingin; hinna lampi chu milungching dingin chunglama aume.

²⁵Mi kiletsah insung chu Pakaiyin alhuhsah ding ahin; hinla aman meithainu gamgichu aphudoh ding ahi.

²⁶Migilou lunggel ho chu Pakai dinga thet umtah ahin; mitheng thusei ho vangchu thucheng ngeitah ahi.

²⁷Mikilose chun a-insung asuhboi bep ahin; hinla nehguh thilho thetbolpa chu kihinso teiding ahi.

²⁸Michonpha lungin adonbutna ding akigeltoh in; migilou kam invang thilseho asodoh jingin ahi.

²⁹Pakai chu migiloute-a konin agamlan; hinla michonpha taona vangchu aman angaipeh-in ahi.

³⁰Mit ha hoi selin lungsung akipasah-in; chule thulhut phatah chu gule chang ho dinga damna ahi.

³¹Hinna dinga kiphona ngailha nakhang chu michingte lah-a achengin ahi.

³²Hilchahna donloupa chun amatah-in hinna chu i-sahlouva akoi ahin; phona kingaipa vang chun hetthem theina akimudoh-in ahi.

³³Chihna hilchahna chu Pakai ginding hi ahin; chule jana masanga chun kineosahna aume.