Read Thado Chin Thuchihbu 16 Bible Online

Thuchihbu 16 - Thado Chin bible

Thuchihbu 16

¹Mihem in alungthimin tohgon aneijin,; hinlah kamsunga kon donbutna chu Pakaiya konbou ahi.

²Mihem khat-in ama mitvetnin alampi jouse chu athengselin amun; ahinla Pakaiyin lungsung chu akholchilin ahi.

³Nanatoh jouse chu Pakaiya pedohjengin, chutile nalunggel ho chu lolhingtei ding ahi.

⁴Pakaiyin thiljouse ama dinga asem ahi, henge, migiloute jengjong nikho phalou ni-a dinga asem ahi.

⁵Lungsunga kiletsah tapouchu Pakai dinga thet umtah ahin, khutle khut kituhmat to jengjongle, ama chu talen manlouva umlou helding ahi.

⁶Hepina leh thutah-in khangitlouna asuthengin; chule Pakai ginna jal-in mihem ten setna adalhaove.

⁷Mi achondanin Pakai akipasah tengle, amelmate jengjong amatoh akichamsah-in ahi.

⁸Chonphatna puma thil themcha khat neichu, alamlouva kimu thil tamtah sangin aphajoi.

⁹Mihem khat lungsungin ama lampi agongin, ahinla Pakaiyin vang amapa kalsonna dingho akopeh-in ahi.

¹⁰Pathen thutanlhahna chu lengpa kamsunga konin apotnin; akamin jong thu atankhel louding ahi.

¹¹Agih dihtah leh khaikot dihtah chu Pakaiya ahin; dip sunga um thilgih kitedoh jouse jong ama boljeng ahi.

¹²Phatlouna tohdohhi lengte dinga thet umtah ahi, ajehchu laltounahi chonphatna-a kitungdoh ahi.

¹³Dihtah-a thu kisei chu lengho lunglhaina ahin, chule amahon thudih seija chu angailuvin ahi.

¹⁴Lengpa lunghana chu thina thupole tobang ahin, ahinla michingin vang hichu asulungdam jin ahi.

¹⁵Lengpa maiso vah-a chun hinna aumin, chule aman akhohsah mi chu gotuilha nunung twimei tobang ahi.

¹⁶Sana sanga chihna kimudoh hi iti phatna pha hitam! chule dangka sanga hetkhen themtheina kilhenjohhi iti phatjoh hitam!

¹⁷Midih lamlhongpi chu agilouva kona kiheimang hi ahin, alampi kituhdetpa chun ahinkho akivettup ahi.

¹⁸Manthah na masanga kilet sahna achen, chule lhuh nading masanga hoithona achen ahi.

¹⁹Mikiletsahho toh thil kichomdoh kihop sangin, kineosah puma minoinung hotoh umkhom aphajoi.

²⁰Koihile hilchahna ngaipha-a chun thilpha akimudoh-in; chule koihile Pakai tahsan chanchu anunnom ahi.

²¹Alungsunga chihna nei mi chu thil hekhen them kitiding ahin, chule nemheuva thu kiseijin hetna apunsah-e.

²²Hetthem theina hi aneijoupa dingin hinna twinah ahin, ahinla mingol ho hilchahna chu ngolna ahibouve.

²³Michingin alungsunga chihna mangchan thu aseijin; chule amuh dingin kihilna abepeh-in ahi.

²⁴Ngainom um thuchengho chu khoiju tobang ahin, hinna-a dinga lhumkei le gule changho dinga damna ahi.

²⁵ Mihem dingin adih tobang lampi aumin, ahinla chuche lampi chu akhonna thina ahijin ahi.

²⁶Natong gimma chun amadinga atohgim ahi, ajehchu agilkel chun atohsah ahi.

²⁷Pathen ngaisahlou michun setna alaidohjin; chule athusei jong meikong tobang ahi.

²⁸Jon lunggelin kinahna atun, guhthim thu seile pan golcha phatah ho asukhenjin ahi.

²⁹Hunam panpa chun aheng akom atilsejin; chule lampi phalouva apuilutjin ahi.

³⁰Aman hoitho thil mitsing leuvin agongjin, akam achaloh sah-in thilse ahinlhutjin ahi.

³¹Tehse samkang hi loupina lallukhuh ahin; Hichu chonphatna lampia kon bou kimu ahi

³²Lunghan nalama ngaikhampa chu thahattahpa sangin aphajon, chule alungsung kivaihom joupa chu khopi khat lapa sangin aphajon ahi.

³³Pheichunga chun vang akisang jin; hinla thulhahna jouse chu Pakaiya ahi.